（photo via cc Flickr user Dennis Wong）
每次我好很好很認真咁話中文系無用時，啲人總係以為我講反話，以為我喺到諷刺緊。
我係好認真的，好直，完全百份之一百認為中文系喺現代香港社會係完全無用嘅。
無用嘅意思係，你成個香港社會都唔係靠呢樣嘢去運作，甚至大家係會以中文差為榮，寫得好啲、講究啲就係「太深」「扮嘢」「好泥古」「係咪想建立中文人話晒事嘅霸權」。
當成個香港都係用緊小三中文時，你學到小六做乜春？
香港大學中文系分三個大範疇，文學、歷史、翻譯。
文學入面嘅音韻、文字學，併入語言學系。反正你本身都唔夠完備。
文學理論，併入比較文學系。反正當年都不停被比較文學系話你中文系「偷佢哋啲理論」。
文言文，泥古，全部毀棄。平仄唔使再學，而家會寫對聯咩？你睇下森美小儀啦，兩句七個字就叫對對㗎喇。使講對仗嘅咩？咁深邊個明？
歷史系，併入西史，反正全部都係中國餘毒。
翻譯自成一系。
我一直都話，中文系係好嘢，中國文化係好嘢，但現代社會唔係由中國文化建構出嚟嘅，而雖然外國都尚且會欣賞同尊重下唔同嘅文化體系，但香港係未進化到呢一步，所有唔符合佢哋「現代準則」「現代美學」嘅嘢都係垃圾都要除之而後快，因為全部都唔完備，全部都係泥古。
根本香港長久以嚟都係咁，就唔好假惺惺又話尊重中文，又話咩保留中國文化啦。
中文系人根本就係喺融冰上嘅北極熊。