來到呢個系列既最後一篇，就係為左講述鄺氏第三式，亦都係最後一式：打圈。
有左呢一式，連埋之前既「截拳」，「還原」，三式就得以全部修習完成。同之前兩式唔一樣，鄺氏第三式，已經唔係單單從一字半句出發，而係為左整篇鄺體文既著墨處，作出嚴謹定義，描繪出一個有力既理論框架，以供後人按部就班去修習。
首先，不論中西哲學，圓，都係極重要既概念。所以即使係日常既流行文化，圓既使用，一樣係歷久不衰，就單講日本動漫，例如火滾忍樣既螺旋丸；鋼鍊既鍊成陣（古代鍊金術既追尾蛇標誌，亦係圓）；以至成日休刊既全職獵人，都有圓作為種種能量既概念，每一款，都係獨當一面既。可能你覺得我講左好多廢話，但一句到尾，無非都係想指出：
圓可以兼容並包，涵蘊住天地萬物，亦象徵住力量既流轉，循環。圓係點樣黎？就係以一點為軸心，圍繞而旋轉，呢個就係打圈。只要你可以掌握到呢個概念，並且運作於鄺體寫作，揮灑自如，一蹴而就，其實唔難。當然，同第二式一樣，第三式學習之前，一定要先掌握到頭兩式，至可以成就大業。或者我地就係呢度，以圖像表示鄺氏三式，究竟係點樣合三為一，成為一篇文章。各位同學，你又準備好未？
如果，普通原文只係一條線：
「截拳」就係第一步：
「還原」就係第二步：
黎到第三步，就係「打圈」。
禮成！！！！
記住，打圈既目的，其實只得一個，就係將文意文氣，同原點一齊連接。一開始既時候，你可能會將「打圈」呢個概念，錯誤聯想至「遊花園」、「講左即係無講」甚至係「阿媽係女人」。有呢個諗法，對於初學者黎講，實在係好正常，但到你完全掌握到「打圈」既精粹，連你個腦都開始打圈既時候。你就會明白，其實當中係有好大既分別：
後者果Ｄ係無意義既廢話，但係鄺體，
卻是經得起時間既洗練，係偉大既，係可以永垂不朽既。
成件事的確係有Ｄ抽象，但去到第三式，困難當然係少不免。如果可以做到一步登天既，人人都係鄺公啦，仲駛咩下一秒，就放屁？希望各位學員能夠用心學習，假以時日，一定會有所領悟。在此我奉上一篇短文做參考，俾大家細意推敲咀嚼：
「我四處奔走，不為別的， 只是簡單的，付出。
在太陽底下，我渾灑的，
每滴汗水，就是小伙子，
一直想，給予大家的，
每一個希望。
我，要給你希望。同時；
你們，也要給我，
一點力量。
就是靠，這點力量，
燈塔我才會，
一直努力啊。
回想起來，
奔走真的，
很賣力，
呀。」
最後，希望大家唔好放棄鄺體，與諸君共勉之！！
參考書目：
[1] 《鄺體的歷史》，跌名，鬥蹹出版社，2016年。
[2] 《如何用鄺體提升中文水平》，我是路人，下世出版社，2003年。
[3] 《鄺氏寫作實用三百題》，艾美圖。和波特，會七之友出版社，2007年。
[4] “Kong’s stylish writing: Theory and Applications.” Emily et. al. Oxfard Press. 2014.
[5] “What Shakespeare can learn from Kong Gung.” R. Phoenix. Canbridge Press. 2008.