「你好啊我讀ibba，你讀咩科咖？」
「er…我讀當代中國研究⋯⋯」
「嘩有科咁既野咩，聽都未聽過喎！」
「哦！係咪得好少人讀果科啊！我上UG都個同學個同房都係讀呢科咖好似！」
「咁其實係讀咩咖，咁係咪好愛國，對中國歷史好有認識囉！」
「其實呢⋯⋯我呢屆有成30個人咖，我呢科主要都唔係讀中史，讀既都係比較當代既野，經濟政治文化樣樣都有⋯⋯下刪千字。」
每次遇到新朋友仔都會經歷上述情況
適逢考完DSE既季節好多人都會再三考慮選科問題，筆者當年同今日上網google過都搵唔到好多有關自己本科既資料，所以就打算小試牛刀寫篇文分享下踏上中研之路同生活點滴。順帶一提，筆者大中爛grade文筆唔太好，1999就原諒我。再順帶提多一提，中國研究呢科係我呢間學校係用英文讀。
講開自己點解要入呢科，其實我都唔太知點解。選科果陣係用刪除法，初中讀過理科、元素表頭廿個都未背到就裸考化學、數學又唔太掂讀唔到物理、生物多野背又要解剖動物太恐怖唔適合我、文學歷史地理電影通通都唔係自己興趣，於是高中我就選擇BAFS、經濟同視覺藝術。讀完三年，到排jupas，就衝住bba、cultural management同design排，結果cul mgt第二年收生標準高咗、bba競爭太大、讀design屋企人擔心日後出路麻麻，去到選科中段一次偶然既機會，接觸到中研呢科，就同佢結下不解緣。
排jupas既時候，其實初初除咗見到係新開既科同收6個人覺得好意外之外後來都係不已為意。直到學校既咨詢日叫我排幾科有興趣既去聽下，見中研呢科時間fit就去聽下。
入到去間房得小貓三四隻，鬼佬負責人介紹下個課程，四年讀晒72 cred major 加其他UG同electives 共123 cred，包12 cred exchange。Course List 都幾吸引，當時心諗LS 當代中國果part 都係咁上下，而係學校既通識科我係當代中呢個國題目都比起其他表現得好，於是我就開始心郁郁想放中研係A123。加上，聽聞入去再轉科都唔係太難。入咗先再諗後路啦！
當年只係收6丁友，將佢放A123其實好似好危，同屋企人分析過之後，覺得佢收得人少報既人都少啫，加上又有得面試，一於搏一搏。（筆者自知成績一般，搵定後路，拎住外國Conditional offer無懼，但又唔想花屋企人太多錢，香港讀到死到留係香港讀）等唔切放榜轉choice 就花少少錢轉jupas choice。A1：當代中國研究（人文學科範疇）、A2：當代中國研究（社科學科範疇）、A3：火雞大學中研
成續出咗，一如所料，廿分頭，九龍塘大學bba都未必收既邊青，硬住頭皮去中研面試，心諗大不了咪死！又好好彩唔知點解佢收我，於是我就碌咗入三大既「神科」，一科好神奇，收得6個人仲要冇細o既科。講真，我好疑惑又好期待，睇下有咩奇人會同我入同一科。
終於等到orientation day，當日見到另外三個同學（4人只有3個Jupas入），呢三條木咀就係未來四年同我相依為命既人⋯⋯（最後仲有另一個non-j女仔加入我地既小家庭）我地見面一見如故，大家都係攤牌話入到黎想轉科，小女子的確有諗過轉去人類學又或者新傳。時間過去，肉一直長，GDP一直跌，去完個exchange更加塵埃落定轉唔走。當初三男二女誓言旦旦話要轉科最後做留守兒童。兩個去北京大學交流投共，兩個去咗中華民國大學，仲有一個唔知點解去咗歐洲小國某經濟大學⋯⋯local細o mate聚係要搭飛機返香港同撘火車反大陸相見。個系細細地，又幾warm。
其實，個系又唔係得我地5個既，其他大部分係外國人。簡單黎講我地係迷你聯合國，中國內地（比較少）、日本、韓國、荷蘭定唔知土耳其、美國、日本MIX英國、澳洲MIX台灣等等既同學仔佔好大比例，係校園要搵佢地既身影唔難，不過落老蘭搵易啲。我地都幾friend，上年去北京探佢地，有正宗韓妹燒五花肉招待我地、又有北京陀地同學帶我地食好西，落五道口既夜店都有人貼身保護⋯⋯仲會互相交流各地流行曲文化。開學第一星期，我既外國同學已經將LMF首14K唱得十分流利。
其實每個中研學生背後都是有故事的人，佢地背景來頭都唔少，好多屋企人都係做外交官領事果類，又有個係老豆係回教定唔知伊斯蘭教神父（總之係唔食豬肉，但我同學好鬼鐘意食叉燒。）我既同學好多因為屋企人要係中國做野而黎香港讀書，而好多內地同學都係讀國際學校出身。佢地係咪對中國文化好有興趣？呢個咁深奧既問題我答你唔到。
講住咁多先，關於學習上既事，下回分解。
以上純屬個人經歷，中研課程每年都會有修改之處，詳程請參閱課程網站，有興趣者自行google。發現有錯歡迎指教。