（photo via cc Flickr user faungg’s photos）
先撇除「講親世代之爭就係雞係公廁！」嘅諗法。好多七十後而家開始好反感啲人講「世代之爭」，講親都有七十後 PM 我狂屌。一方面你可以話「世代之爭」係粗疏，「以偏概全」，但係唔同年代嘅人有唔同嘅性格。
講真，七十後真係好乖。係超乖。工作場所裡面，七十後真係普遍肯 OT ，好似牛咁做，老細話乜就乜，係好好嘅職場螺絲，工作中堅。呢個係事實。你見好多七十後手殘志不殘，唔識打中文字都用手寫板雕字，就知佢哋有幾強嘅毅力啦。對比起五六十後乜撚都唔識都可以賺好撚多錢超級大錢，七十後係去唔到五六十後咁嘅位，但係七十後做一個中層管理，無咩問題。咁你話中層管理都好有危機呀，中年會被人炒呀，係！係真嘅，而家國泰呀，九巴呀，咪炒緊囉。但最少都見過五六十後榮光，都沾到少少樓氣，財氣，都知道咩叫搵到錢吖。
八十後其實都已經開始面目模糊，隨住年紀漸大（well……），其實部份都開始進入「senior officer」/「assistant manager」嘅階段，係分唔到大錢，但其實又唔少人都望到有機去到「中層管理」呢個階段。另一方面我好認同篇文嘅係，八十後都會講下倫理，大家唔好面左左（我呢類憤青係少數啦），分析下行政上管理上或者手段上有無咩可行嘅方法，諸如此類。另一方面，我哋無咗七十後果種「要做牛先係乖！」嘅諗法，反而多咗人探索生活嘅其他可能性。你見八十後比七十後更多人有嗜好，有深入發展嘅副業，就係例證。
九十後開始，真係好憤怒。係好似「浪客劍心」入面個安慈咁，不動明王修羅滅世，因為覺得香港太醜惡，你上面班人（包括八十後）都係死不足惜，死晒之後死剩嘅先可以重新建立一個新嘅美好世界。係好偏激，甚至其實九十打後果班都係與我為敵（萬惡撚屌八十後霸住「高」位），但某程度上我又理解佢哋。理解唔代表認同，但最少我大約明佢哋點解咁憤怒，亦唔會用「反屌」嘅方式試圖令佢哋唔憤怒。因為你反屌係唔會有用㗎。
假如話五六十後嘅人生目標係可以去到賺好很多錢，多到係十幾廿層樓，幾千萬現金（喂我唔係話個個五六十後都係咁呀，按照「地球上所有嘢都係以偏概全」定理，總有啲人係窮㗎！係講緊成個世代嘅機會同勢頭呀），七十後可能係講緊搵十萬八萬已經算心滿意足，有層太古城或者私樓揸下手咁。八十後呢，可能預期自己頂盡都係三四萬人工，買樓？有父蔭咪細舊私樓囉，一係就舊居屋㗎喇。喂其實舊居屋畀「中產」，對上一代嚟講叫「折墮」㗎喇，幾多老人家係歧視居屋呀。但係你望下同儕，望下九十打後，佢哋唔好話買樓喇，搵份似樣少少嘅工都無呀！
另一樣我覺得驗證到九十後思維嘅係，好多九十打後真係好相信黃毓民先生、熱血時報同城邦果一套。首先我覺得信邊套其實真係無問題，港獨也好，歸英也好，都無問題。真的。問題係，其實我喺熱普城聯盟裡面睇唔到論述嘅一致性同可行性。唔好誤會，我係講緊佢哋現時嘅「制憲」策略我睇唔明，陳雲雖然早年已經封鎖咗我，但我認為陳雲對於香港轉向討論獨立，係有不二之功。對於香港人鬆綁「血濃於水」「大家都是中國人」，居功至偉，無一人可望其項背者。如果唔係有陳雲，全香港應該仲戇居居講緊自己係中國人，大家覺得普教中唔妥但又會由得佢咁樣，港中融合應該會快到好似澳門咁。
問題係，其實陳雲先生好似從來無贊成過港獨建國，城邦最核心思想好似係講緊永續基本法，頂多係重新立約，而立約嘅範圍就係「真．一國兩制」。而成個聯盟中其他陣營嘅諗法又似乎唔係好對得上口。但我唔係想抽秤呢樣嘢，我只係想將之作為一個現象去分析，就係，對於九十打後嚟講，畀到願景佢哋，佢哋就會相信同支持。而呢樣嘢，係五六七八十後應該理解，先承認現象，再諗方法去磨合嘅。
而家最大問題係，九十打後好憤怒，然後對上四代用佢哋嘅權力、資歷，大聲怒屌九十打後，本質就係父權就係家長式管治。九十打後又點會啋你？當你七十後向上望一望自慚形穢，你以為自己已經係經歷過 97-03 苦大仇深，你就不免會覺得自己都係受害者，覺得九十打後有咩資格呻慘，仆你個臭街云云。殊不知九十打後其實面對可能更重大嘅困境。
我覺得每一件事發生都有佢嘅原因，每一個人都唔應該否定個原因，而係應該梳理、理解個原因，尋找真正嘅共識。有權力，有年齡嘅人，更加有責任去做呢樣嘢，因為：喂你年紀大啲，學識修養好啲都好正常嘅要求啫。