細個以為污糟衫放左落污衣籃就會乾淨返，大左住hall 成堆衫就同roommate 推黎推去都唔想洗，但係去旅行時人在異地，媽媽又冇，連洗衣機都冇⋯⋯ 唔通真係要比幾十蚊港紙洗次衫？
係呢個時候，我就好感激我仲有一雙手。
之前提過backpack唔好帶咁多同咁重的衫，原因只有一個：難洗。做得backpacker，大多都會係旅程中穿州過省，好少只係stay係一個地方，有D地方甚至只會留兩三日，如果要洗衫，咁就GG了。所以我都好少會帶牛仔料的衫褲，甚至有d 棉質的吸水力特強的都可免則免啦。
去旅行前可以搵d 樽仔入起屋企的洗衣粉/洗衣液，都可以去到先搵d 手洗專用的洗衣液，有細細支牙膏size，係洗衫同柔順二合一，咁就會方便少少啦。內衣褲我都盡量每日洗，始終都怕乾唔切嘛，冇底褲著真係唔知出唔出街好⋯⋯ 面衫就通常到個個地方的第一日洗，就會有多少少時間比佢乾，唔洗嗡住係個袋啦。
如果咁好彩，住個度有得免費洗衫，緊係打死都洗多次d 衫啦，唔係唔想信自己對手，而係⋯⋯我覺得自己真係信唔過呀！
P.S. 試過比€5 洗一次衫。