早兩日本土民主前線梁天琦宣佈參選立法會，在此之前我一直費煞思量，都搵唔到一個九月會入票站既理由。
首先就梗係唔好同我講乜野投票係公民責任，呢D 留返同細路仔講架姐，如果兩張飛都無一個圓圈值得我蓋印，我做乜要入去？我點解唔打機唔做GYM唔HIGH TEA？
可能有讀者睇到呢度，會問做乜唔投超區，明明陳國強鄺俊宇呢D 都睇得下，唉是咁的，我個註冊教師資格跟我一世（除非我衰風化案），係教育界選民，咁教聯同教協都做得咁好，之前我諗住就算要投，都同時蓋曬兩個圈佢，以示我對佢地既支持咁囉。
超區唔關我事，教育界又這副德性，其他候選人更加唔值得我走入票站。
但講明呢個係梁天琦選舉廣告，咁我梗係唔會講第D 人點唔掂，倒不如我講我鐘意天琦D 乜（非HEHE）
話說港大前校園電視新聞總監阿Nora 女神拍左套紀錄片，講幾個年輕人雨傘革命前後的人生，咁早兩個月佢就搵埋本土民主前線假沙田大會堂對出樓梯搞社區放映。
戶外放映兼同支持者見面既野，甩漏就梗係多架喇，拖電線絆倒信徒啦、喇叭唔夠聲啦、賣衫籌錢無衫啦（嗯，我個件俾左錢還未拿）、個SCREEN 唔夠大啦，都數唔到咁多。
其中個SCREEN 就係上圖咁，三隻腳弱質纖纖，大風少少咁點？咪成個吹跌囉～
睇到呢度，大家可能覺得我埋怨緊梁天琦無用，連播套戲少少野都搞到咁，仲選乜X 野，選手指啦～
唔係咁。
我活到呢個年紀，見到所有人既失準實在太多，包括我自己都成日做唔到滿分，呢個世界，好多人面對呢D 野，只係會埋怨，埋怨個場無電制，埋怨D 觀眾眼矇，埋怨條街大風，埋怨屬下唔帶夠衫去賣，咩野藉口我都聽過，而真係好似梁天琦咁，成個人坐落去個SCREEN 隔離，扶住佢直到完場，咁身先士卒既領袖就好少見。
大家留意番，呢個時候既梁天琦，係二月個陣拿了六萬六票的梁天琦。
佢無被呢個數字沖昏頭腦，唔會自封為領袖就坐埋一二邊齋督人做曬D 奇怪野，佢係同所有兄弟姊妹一齊完成一件事。
政治既野一日都嫌長，佢當選之後會唔會變衰人我唔知，但環顧其他候選人，好多的確一而再再而三四五六七咁令我失望，呢一刻我真係好想支持梁天琦入立法會。
佢是咪會好似神仙咁改變到成個局勢，我諗好難，但係路就係要逐步逐步行，下一步獲得公職，有身份，講野就有份量，呢一步係重要既。
我係新東選民，九月四日，我會走入票站，希望送佢一程。