香港浸會大學國際學院石門校園（photo via cc Wikimedia Commons user WiNG）
放榜後，成績未如理想嘅畢業生一般都會考慮選讀副學士同高級文憑。除咗價錢、聲譽、地理位置等嘅考慮因素外，升學選擇亦都係其中一項最重要嘅考慮因素之一。除咗主流嘅政府資助學士學位課程同自資學士學位課程，銜接學位亦提供咗多一條嘅升學途徑。眼見身邊都有好多朋友搞唔清楚咩係銜接學位（Top-up Degree）。有見及此，容我向大家詳解一下啦。我在此將會概括吓大家嘅疑問，方便作出解釋：
FAQ1：咩係銜接學位？
銜接學位係一種專門畀副學位，即係副學士同高級文憑畢業生升讀嘅學士學位課程。一般情況下，銜接學位會承認相關副學位嘅學科內容作豁免要求，變相以更短年期完成學士課程。一般嚟講，銜接學位修讀年期約為一至兩年，視乎各院校、課程要求。
FAQ2：銜接學位係咪學位？
係。學位課程係學士、碩士、博士課程嘅統稱，唔會有一種學歷叫「銜接學士」。若你修讀銜接學位，你嘅資歷亦等同其他學士，視乎你係文科定理科而頒授為文學士、理學士等。
FAQ3：銜接學位有咩種類？
香港嘅銜接學位主要有三種，包括政府資助學士銜接學位（UGC top-up）、自資本地學士銜接學位（Self-finance top-up），以及海外大學銜接學位（Overseas top-up）。政府資助學士銜接學位即係由大學教育資助委員會（教資會，UGC）資助嘅院校（八大）所頒授嘅學位課程，例如香港大學嘅信息管理（榮譽）理學士學位課程、香港理工大學嘅民航工程學(榮譽)工學士學位課程，都係分別直接由港大同理大直接頒授證書，學費亦都係$42,100一年，修讀年期為兩年。自資本地學士銜接學位即係由自資院校開辦嘅銜接學位課程，例如香港浸會大學國際學院（HKBUCIE）、香港理工大學專業進修學院（PolyU SPEED）、香港公開大學、恒生管理學院等。相對政府資助嘅銜接學位嘅學費，自資會貴上40%至140%不等，視乎院校定價；頒授嘅院校性質亦好唔同，例如浸大國際學院畢業證書係由浸大本部頒發，而理大專業進修學院係由進修學院頒發。主要分別就係在於你持有嘅係大學頒發嘅證書定係學院頒發嘅證書（一般嚟講出嚟搵嘢做無乜分別，但如果想進修碩士或博士有可能有影響）。海外大學銜接學位係指一啲喺香港開辦符合《非本地高等及專業教育(規管)條例》(第493章) 定義下已獲得豁免註冊嘅非本地課程，例如香港城大市學專業進修學院（CityU SCOPE）、香港大學專業進修學院國際學院（HKUSPACE IC）等開辦嘅課程。呢類課程嘅證書係會由海外大學直接頒授，又或者由海外大學及本地院校聯合頒發，視乎課程而定。因為唔同國家嘅學制問題，有啲海外大學銜接學位修讀年期可以短達一年或者一年半，變相可以更早畢業投身社會賺取工作經驗。學費方面同自資本地學士銜接學位則差唔多，都係比政府資助嘅銜接學位貴上40%至140%不等。
FAQ4：銜接學位有冇認受性？
我會將認受性呢個問題分做兩部份咁睇：官方標準及社會觀念。根據香港學術及職業資歷評審局（HKCAAVQ）網頁顯示，一啲已註冊為資歷架構第五級嘅銜接學位課程，認受性係等同本地大學資助學位；而無納入資歷名冊嘅銜接學位課程，政府係有權唔當你係學士畢業。如果有需要，畢業生可自行去HKCAAVQ做學歷評審。社會觀念方面其實好主觀，無一套特定嘅標準話當唔當你係大學畢業，亦無一套主流價值覺得銜接學位就一定唔夠競爭力。修讀一科銜接學位之前，可以先上網搵下相關行業嘅資訊，例如讀完有冇得考牌、入行嘅學歷要求等。
FAQ5：銜接學位升學要求？
如果你將來想繼續進修，無論你讀咩類型、咩主修嘅銜接學位都好，我都強烈建議你揀科「榮譽學士」課程，因為研究院傳統嚟講會較偏好取錄榮譽學士畢業生。所以榮譽學士會大大提高升讀研究生（包括碩士博士）嘅機會。只要你係一級榮譽畢業，你可以直接升讀哲學博士（Ph.D.），二級榮譽畢業亦可直接升讀碩士課程。同認受性嘅問題一樣，無話銜接學位就好難升研究生，一切都係睇成績同面試。
參考資料
1. http://www.hkcaavq.edu.hk/zh/services/accreditation/academic-accreditation
2. http://www.hkcaavq.edu.hk/zh/services/assessment/non-local-course