http://www.wellingtonstravel.com
卿卿唔明白，到底係咪香港人呢個身分太委屈某啲人，佢地出盡九牛二虎之力都要俾人知佢「唔係香港人」（但明明攞嘅係特區護照，講嘅係粵語，英文/外語又唔係好）。
又係令到卿卿想一把車埋去嘅人。
呢種人已經唔係扮ABC咁簡單，佢會不斷提醒你，佢同你唔同，咩都好過你，佢係「外國人」！
卿卿遇過最經典嘅，係一個叫管家嘅朋友。管家都幾好彩，祖輩喺澳洲有投資，以至佢都有澳洲護照。不過，佢未用過佢本澳洲護照、冇去過澳洲、同埋佢本護照過左期。（以我所知佢去旅行用特區護照）
咁但係佢會用盡任何方法令識佢嘅人都知佢係一個「澳洲人」。
首先，管家啲英文好·很·難·聽。係典型懶有外國口音嗰隻，但其實好多發音都錯，更唔好講佢啲文法其實都幾差。好多香港人會誤以為難聽嘅英文聽落似澳洲口音，但對英文同口音略有研究嘅卿卿可以拍哂心口同你講 —— 佢嗰啲一定唔係澳洲口音，同埋我喺大學四年冇見過有人英文咁難聽，又要曬命 （可能誇張左少少，不過如果管家你睇緊，唔好再成日炫耀你啲所謂英文喇，我真係忍得好辛苦⋯我啲外國朋友都忍唔住笑你，兜口兜面講就廢事啦）
好喇，管家無論對住我，定佢/我啲朋友，一有機會就會曬下佢啲英文，講下佢係澳洲人。對住外國人就會話「I’m an Australian 」有一次我聽到佢喺電話講：「作為一個澳洲人，我覺得悉尼點都好過邊度邊度囉⋯⋯」吓，你唔__係呀，你連南半球都冇去過，仲大大聲喺度扮專家？
有一次，卿卿忍唔住，同佢講：「其實⋯你係澳洲籍架咋啵⋯」你估吓佢點答？「咁喺英文入面冇特別澳洲籍呢個字吖嘛，都係Australian。」嗰一刻，卿卿冇出聲。因為佢已經去佢一個冇得救嘅地步。
—— 宜家係卿卿英語一分鐘嘅時間 ——
如果用英文介紹自己喺邊度人，可以話
I’m from Hong Kong. （我來自香港。）
I’m Canadian. （我係加拿大人。）
如果想強調自己有某個國籍，可以話
I’m an Australian citizen. （我係澳洲公民。）
I have an Australian passport. （我有澳洲護照。）
—— 多謝收睇卿卿英語一分鐘 ——
我都廢事多講，總有一日佢會同人講「我係澳洲人」，然後會有人問「𠵱？咁你住澳洲邊度？」
卿卿識唔少人有外國護照，招搖到好似管家咁真係第一次見。唔少有外國護照嘅朋友，都會同人講「我係香港人」。好多時候，佢地知道能夠有多本護照係好彩（多數都係因為父母一早安排好）。卿卿有個朋友，係中英混血兒，自小喺香港長大，讀國際學校，連少少英國口音都冇。有一次我話佢係英國人，佢話:
Nah. My dad is British, but I grew up here. I’m from Hong Kong.
連一個（其實係半個）英國裔嘅鬼佬都唔認自己係英國人，強調自己係香港人。你嗰啲連澳洲都未去過嘅所謂澳洲籍（仲要護照過期！），就算罷啦。