呢個世界上有啲人，無論你幾時見到佢，都係咁想搵窿捐。就算你化咗妝定素顏，戰鬥格定街坊裝、拖住條仔定單拖，你一撞到佢個刻都會頓時無地自容，好似赤裸裸咁企咗係佢前面，走又走唔到，say hi又唔係幾好。到底係咩人呢？唔係你個ex，又唔係你債主，而係曾經暗戀仲要失敗嘅對象囉。
話說，中學時期，唔知點解師兄總是型英帥靚正，同級同學硬係低B加幼稚。於是，我同云云男女校妹妹一樣，返學個時最鍾意𥄫高form師兄。記得我中三嘅時候，有位中六嘅師兄唔單止係籃球隊隊長，仲要身高180，加埋一對大眼睛同陽光笑容。如此接近神嘅男仔理所當然係學校嘅風頭躉啦。小息時偷偷地去撞佢，lunchtime咁岩同佢去同一間餐廳食嘢已經夠我開心幾日，真係諗起都又天真又傻。我諗，個時除咗我應該仲有無數師妹都係咁冧佢，所以佢對自己練波個時有一堆妹妹企係場邊都完全見怪不怪。
個時仲係有xanga嘅時代，每日一放學返到屋企就要確保logout咗自己個xanga，然後再上佢嗰個。點解呢？因為個時有個唔知咩網，只要你輸入自己xanga id，就可以睇到有咩人睇過你個xanva。所以，我每日都好小心咁偷睇佢日記，再用個個網檢查吓有無留下證據。如是者，我一路都以瘋狂stalker身分偷偷接近佢。
直到有一日，我如常咁上完佢xanga之後，發現咗一個晴天霹靂嘅消息—我！唔！記！得！登！出！呀！！！於是，我每日睇十次嘅習慣亦都俾佢知道咗。跟住個日，lunchtime時我行緊出去食飯嘅時候，師兄竟然停咗係我前面！當然，呢個係真人真事，唔會好似韓劇咁佢即時壁咚我同我講「其實我都留意咗你好耐」，而係佢轉個頭嚟望住我，然後右邊嘴角向上冷笑咗一下。我無睇錯呀嘛？佢竟然公然恥笑我嘅呢個無知少女？個刻，我心情直插谷底。我發誓，我唔會再暗戀呢個男仔。
一個星期後，係我搭車返屋企嘅途中竟然又撞到佢。因為師兄同我住同一條屋邨，所以其實撞到佢都唔係咁出奇。落車後我已經特登行都好慢好慢咁返屋企，希望佢唔好見到我。點知佢仲要一路行一路用眼尾望住我，好似懷疑我跟蹤佢返屋企咁，直到佢入咗佢住個棟都仲望緊我。我真係好想跑過去同佢講，「師兄，其實我住隔離個座囉，堅唔係跟蹤你！」不過，廢廢如我緊係一枝箭跑返去屋企喊濕幾個枕頭啦唉。
師兄畢咗業之後，我都已經淡忘了呢個人。但直到依家，我都仲係唔敢係任何社交網絡上同佢做朋友。我好廢，我認。
今晚突然興起，決定一條友去屋邨附近跑步。其實我一直都覺得跑緊步嘅女仔係好索兼好有型。正當我岩岩跑完一圈，享受緊呢個咁有自信嘅moment時，幾年無見嘅男神竟然係我隔離做緊熱身。唔係呀嘛？！係個刻，所有中三時嘅瘀爆記憶即係浮哂出嚟。雖然廿三歲嘅我已經唔再係中三個時咁百痴，但估唔到，我到依家見到佢都仲係咁想搵窿捐⋯⋯點解？點解我可以咁失敗呢？於是，我再一次係佢面前暴走返屋企。
師兄，幾年無見，你都仲係咁靚仔咁有型。不過，我真係唔想再撞到你啦，放過我啦好嗎？