（仲有一包，食唔食好？人生………..）
由細到大，我都好鍾意食即食麵。除左較為大路既出前一丁同農心之外，就一定數到福麵。福字米粉，雞汁伊麵既水準都好高，我最愛既係佢個隻冬陰公湯伊麵。雖然佢可以話係一啲冬陰公味都無，但真係好惹味，配合埋福字獨特口感，只可浸熟而唔可以過火煮既麵條，可謂perfect match。
今日我路過超級市場，見到包福麵，心諗都半年有多無食過，買兩包返屋企爽爽。返到去，打開個包裝，唔撚同以前既喂？以前一包福字冬陰公麵入面，有麵餅，一包湯粉，一包辣粉，一包豬油，頭先一打開，得返一包調味粉。你老母我包豬油呢？我包辣粉呢？做咩搞到成包媽咪麵咁撚樣？
個一刻我已經相當不安，但唔開都開左，唔通唔食咩？焗完，食第一啖，真係屌左出聲。以前個種獨特既香味無晒，取而代之係一陣擺明係扮冬陰公既化學酸鳩味。好沮喪，好撚失落，陪左我十幾廿年既美味可以忽然間消失得無影無踪。我望住眼前個碗我都唔知點形容既垃圾，望住個個酸鳩味半透明好似督尿咁既湯底，我望唔透，我唔知人生仲有啲咩可以掌握到。
上網一睇，原來今年4月個陣，福麵轉左原產地，冬陰公麵由泰國轉左去越南，成件事就係咁唔同晒，留住個外殻，入面根本係第二樣野。
最後我有無食晒碗麵？係呢一刻我都未，但我相信我會的，只係，再無下一次。回憶好脆弱，我怕呢碗屎一樣既麵會取代左我既回憶。呢件事唔係第一次發生，大家諗諗，十年前既出前一丁雞蓉麵，同宜家個陣鳩味分別幾大？