不如講返暴龍機。
早兩日睇咗篇文，提起暴龍機，真係相當懷念。
唔好講笑，當年暴龍機都真係一股熱潮。係無好似今時今日的Pokemon Go咁一爆而紅，但慢慢滲透到個個細路隻手Chok下chok下，人人一機在身〈甚至一抽在身〉，隨街real battle，仲有複雜的進化系譜、屬性系統……當年同Pokemon真係可以一爭天下。
暴龍機的成功亦唔係一朝一夕。講到可携式育成電子寵物，當然唔少得數碼暴龍的前身「他媽哥池」〈Tamagotchi〉，玩家可以餵嘢食、同佢玩，有屎仲要幫佢打掃。96、97年同時期仲出咗好多養人、養龍等遊戲，但都離唔開相同玩法。熱潮來也快，去也快，新一代虛擬電子寵物除舊有玩法外，亦要加入新元素，於是就誕生咗一系列劃時代的數碼暴龍機。
先講下對戰同進化。要將隻數碼暴龍成功進化，唔止係要散步打怪（初代暴龍機好似係未有計步功能。當時我係由超數碼暴龍機開始玩起，所以唔太清楚），仲要考慮好多因素影響升做咩獸、上唔上到完全體等，例如要勤力餵食、打掃，最重要係要保持對戰勝利率。但對戰就一定要有對手，如果位小朋友無兄弟姊妹一齊玩，又唔係有錢到可以買兩部自己左手打右手，就只可以出街搵人對打。
於是呢隻遊戲做到好好嘅社群效應，搞到成日有一班細路聚集係公園、球場、百貨公司玩具部之類嘅地方不停對戰，同時交流進化、chok機心得。記唔記得有個拆機用鉛筆劃咗某塊鐵片，就可以按住C掣加速隻怪嘅生活節奏嘅秘技？我都係行過吉之島同個唔識嘅人對戰完，佢就幫我拆開改機。人有我有，有機就通街都係朋友，只不過今日帶起潮流的變成了Pokemon Go。
另一方面，個遊戲最攞膽嘅位，係隻數碼暴龍會死的。Pokemon我都打過幾代，啲小精靈會永遠都存在，最多放入電腦儲低，但佢唔會死，去一轉Pokeshop「凳凳凳鄧登」就救得返。於是對玩家黎講，一隻Pokemon好可能只係一件戰鬥工具，係一隻奴隸獸。但數碼暴龍唔係咁，佢會長大，會病，仲會死。Chok住暴龍機，你會好似動畫入面被選中的小孩咁，同隻數碼暴龍經歷一段成長歷程，一齊行街食飯，幫佢清潔，佢就會進化，為你而戰鬥，亦會死亡，變返一隻數碼蛋。
記得當年訓醒起身見到隻數碼暴龍進化咗，個種心情係何奇驚喜；又試過千辛萬苦咁進化做究極體 〈無記錯係飛獅獸〉，點知過咗幾日就見到變成電腦，幾唔開心……當時真係有死咗個仔嘅感覺。Pokemon？你永遠都控制住佢點進化，點學技，點升lv，其實有幾多人真係好似小智咁當佢地係神奇寶貝？
散步、進化、對戰……其實廿年前已經有呢個概念迷倒一眾小朋友，佢就係暴龍機。今日你我齊玩Pokemon Go，做一個精靈訓練員，落街一同瘋狂，背後係咪亦有一段屬於數碼暴龍的童年呢？