（photo via cc Flickr user Francis）
上次提到，喺挪威約會大致係咁：
1. 雙方喺某啲場合認識（通常都係有酒飲嘅地方，詳情可參考《挪威醉酒七部曲》上/下）
2. 合眼緣？床上見
3. 琴晚唔錯，可以交換電話，下次再約
4. 約黎飲野/睇戲之類，進一步認識大家
5. 又係床上見
6. 仲OK？下次可以再試試
7. 重覆可能唔知幾多次先出街食飯
有人可能會好奇，點解咁遲先約食飯？對於唔少國家嘅人，甚至香港，「出街食飯」好多時候係俾大家傾下計，互相傾認識，一般都係開始正式拍拖前要做嘅事。但係挪威人覺得「出街食飯」係關係已經發展到一定地步，雙方都幾有認識，先做嘅事。「出街食飯」係談情說愛，唔係用黎彼此認識架。
三. 嗯，挪威人「拍拖」嘅概念好有趣。
尤其係年輕人，除非一齊左好耐，佢地好少講到明「你係我男/女朋友」。一般西方國家話Dating基本上都係正式拍拖咁滯，但對挪威人黎講，呢種係Hang out。正如上次所講，挪威人有一個概念叫Holde på ，代表住雙方有好感，超越朋友關係，但未係好正式拍緊拖。仲有，Holde på可以維持好很耐架！所以，好鍾意搞清楚「你當我甚麼」嘅朋友仔，睇你好唔好彩喇。
四. 嗲功係挪威人身上係冇用
所謂「撒嬌的女人最幸福」，香港男仔鍾意女仔嗲啲、多啲撒嬌，覺得好可愛（卿卿見過有女仔嗲到把聲就黎變卡通人物，真係當場打冷震，但係條仔又好受落喎）而有啲鬼佬都會覺得亞洲女仔撒嬌好得意，不過呢招喺挪威人身上用處不大，甚至會有人覺得好地地點解要扮細路？所以做番自己就最好！同埋總有啲男仔鍾意女仔又靚又唔好太聰明。你果你係呢種人，哈哈唔好意思，Bimbo呢（即係胸大冇腦，腦大生草嗰啲）⋯⋯市場唔大。
五. 同挪威人拍嘅好處：唔使擔心身材！
挪威人真係咩身材都有，但唔會好似亞洲人咁過分鍾意瘦。尤其是女仔黎講，就算你身材一般，挪威伴侶唔會因為咁而唔鍾意你。同樣地，挪威男性亦好少因為一個女仔好瘦而對佢有特別興趣架！
六. 除左飲咖啡，仲有另一個方法知道挪威人對你有冇興趣：
如果有人不斷望住你（尤其是喺酒吧），又對住你微笑，你知啦眉來眼去大法吖嘛。得架喇，去馬啦！聽過一啲誇張啲嘅故事，大致上係一男一女喺酒吧度遠距離眉來眼去左一個鐘，冇其他交流，然後就開開心心床上見嚕！仲有啊，北歐女仔好多都比一般歐洲女仔主動架！祝君好運哦，科科～
如果鍾意記得多多支持喔！