（photo via cc Flickr user Ava Randa）
有一啲讀者可能會對早排一篇文章《有一種人，好鍾意扮外國人》中嘅管家有印象（冇印象唔緊要，可以依家去睇）。到底管家同卿卿係咩關係呢？嗯，有留意標題嘅大概都估到——佢係卿卿喺外國時候嘅Roommate。
卿卿大大話話讀左四年大學，前後有大約十個roommate，你知啦又summer hall又一個學期換一個交流生乜乜物物。roommate呢，短則一齊一頭半個月，長則一年半載（我識人讀左幾年都係同一個roommate⋯⋯）所謂相處容易同住難，唔係人人都夾得埋架。
而管家，就唔係一個普通roommate，更唔係一個普通人！ 話佢唔普通，當然唔係指佢「澳洲人」嘅身份啦。首先，管家好勁架，佢話佢「睇人」好叻，成日強調可以喺三十分鐘內睇穿一個人。令卿卿即刻諗起BBC套Sherlock入面個主角可以望下你就知你係咩人咁。計我話，佢呢啲咁出色嘅人才應該幫重重案組呀、咩聯邦調查局呀嗰啲做咩，查案一定好叻啦係咪先。
不過呢個都唔係卿卿話佢唔普通嘅重點。喺解釋之前，先講少少背景。
話說管家早過卿卿一日到埗，間屋好吉，於是管家問都唔問就買左幾千蚊「用品」，當中有多唔等駛嘅嘢，反而真正要用嘅，電熱水煲呀、多士爐呀、微波爐嗰啲，佢就點都唔肯買。想飲熱水？可以用平時煮麵個煲。想食多士？用平底鑊啦。
但唔知點解，佢特別抗拒微波爐。卿卿有次見到個唔錯嘅二手微波爐，問佢有冇興趣夾錢買，佢話：
「No. I don’t like microwave.」
英文稍為好少少嘅人，大概都會覺得佢咁答好rude，可能管家好想強調佢唔想用個微波爐掛。咁卿卿都明嘅，唔係人人鍾意用微波爐，話說卿卿嘅老母就係其中一人。咁冇所謂啦，自己出錢囉。後來先知，管家唔係唔鍾意微波爐咁簡單。呢個同佢一項特別嘅能力有關⋯⋯
嗱嗱嗱，絕無半點吹水成份呀，管家話佢
有.陰.陽.眼⋯⋯
⋯
⋯⋯
⋯⋯⋯⋯
嗱嗱嗱，仲未完！
（吊下你癮先，下次再慢慢講你知）
如果鍾意記得多多支持喔！