推粵語粵文，就要推埋香港文化

當香港成為（再次成為？）文化輸出國，咁粵語就會得以發揚光大，其他人就會有興趣學粵語。所以推粵理所當然係要推埋香港文化。

亦即係話，你今日每睇嘅一本書、每寫嘅一個故事、每拍嘅一齣戲、每作嘅一首歌、每畫一幅畫、每作一首詩、每保留嘅一段歷史、每一個諗嘅哲學問題﹣總之一切同文化有關嘅事，當你肯去投入同創作，你都係幫𡁵手去保存粵語。

但其實可以諗得再宏大啲吖；點解係「保存」就算呢？點解唔係將粵語發揚光大呢？點解唔可以係吸引到外地人覺得「學粵語原汁原味去欣賞香港文化都好喎」（就好似學日文睇動畫、學韓文睇韓劇、學希臘文睇哲學一樣嘅原理。）？未必唔得嫁𡃓。

一個城市叻喺金融、叻喺賺錢，雖然對發展文化都好重要，因為錢本身都好重要、好有用。但呢啲係過眼雲煙，呢啲技能又好容易畀人取代。相反，一個城市叻喺歷史、文化、思想，呢啲嘢儲低咗之後就難以磨滅。

香港其實都係一個好新嘅城市（由開埠到而家都只係一百七十幾年），未算有好多深厚嘅傳統、文化同歷史。但係咁亦都代表我地未有好多嘢框死咗自己、唔需要努力突破傳統，咁反而可以多啲自由發揮。創作就係唔知結果、就係亂試、就係將你認為有意義嘅嘢用你覺得最好嘅方法表達出嚟。

冇人知香港係咪會做下一個「劇集出產國」、定係「港故出產國」、定係「電影出產國」、定係一啲離奇古怪嘅文化出產國。十年前邊個會知韓劇可以多人睇過日劇？最初寫英文文學嘅人點知英文會成為國際語言？邊個會知台灣布袋戲會畀日本制作公司睇中而整咗套《東離劍遊紀》？邊個會知《無間道》會畀外國翻拍然後仲拎埋金像獎？邊個會知村上春樹嘅日本小說會成為美國Bestseller？就係因為冇人知、冇人預測到，所以你唔洗理呢啲嘢，淨係埋首創作自己覺得有意義嘅文化就可以。成功與否，呢啲係之後嘅事，你好難事先預測。只不過，如果你唔發揮，你就預咗畀人影響，預咗接受人哋嗰套文化。

當然，遲起步亦都有另一啲難題——就係而家資訊發達，所以冇咁容易圍爐自己玩。咁嘅話，一個城市係會易啲畀「外國勢力」影響，冇得「閉門造車」慢慢蘊釀自已獨特嘅文化。咁你一係就排斥外來嘢，一係就將外來嘢嘅精髓拎出嚟轉化成自己嘅嘢。