韓風興起，好多人話唔明點解啲人明明唔識韓文都咁迷K-Pop；唔明啲歌詞，到底點會有共嗚？
首先，唔明歌詞就唔可以有共鳴㗎咩如果旋律加上歌手嘅演譯，足以打破語言嘅障礙，振撼人心，唔係更加勁咩？如果一定要識嗰種語言先鍾意得，咁你唔使諗住將廣東歌推廣到世界各地啦～再者，呢個世界有翻譯，唔識韓文都識google 歌詞翻譯吧？有好多人好有心地做翻譯，就係為咗將好嘢傳開去。事實上，亦真係有好多人因為鍾意聽K-Pop而學識韓文。
撐K-Pop係親手將廣東歌送入絕路？乜聽K-Pop就唔可以聽廣東歌㗎咩？又唔見你話聽英文歌聽日文歌會將廣東歌送入絕路？其實大家可以同時聽K-Pop同廣東歌，加埋英文歌日文歌國語歌都仲得，有咩衝突？親手將廣東歌送入絕路嘅係，香港成個文化，根本容納唔到音樂，或者再大啲，係容納唔到藝術。
當香港人聽到人地話玩音樂，第一樣諗到嘅係咩？咪就係廢青、mk、發明星夢囉。如果話夾band，諗到嘅就係廢青、mk、紋身、煲煙、飛仔、嘈音、粗口……全部全部都係衰嘢嚟嘅。咁你想廣東歌點發展？當你見到啲中國乞兒喺街放個大喇叭製造嘈音都冇人趕，仲有啲天真大愛人士雙手奉上金錢，但年青人想喺街頭玩下音樂都俾警察趕，仲俾人告非法行乞，你真係認為趕絕廣東歌嘅係K-Pop？你知唔知人地投放幾多資源喺娛樂事業？你知唔知人地就算二十歲出道嘅新人，閒閒地都已經做咗七至十年練習生？
香港絕對唔係冇人才，而係無論政府定一般市民，根本睇唔起做音樂或做藝術嘅人，然後就唔願投放資源去發展，亦唔願花時間去了解。