香港民族黨集會嘅最大意義

即管喺技術上、時間安排上有啲小甩漏，今次香港民族黨嘅集會都真係搞得有聲有色。更重要嘅係，今次嘅集會真真正正為本土派、獨派界定咗一條新路向。

好多人批評話本土派欠缺論述，但殘酷嘅現實係我地欠嘅遠遠不止於此。陳浩天同佢嘅民族黨睇得好透徹，清楚了解本土勢力不足嘅地方包括：財力、人才、資源、曝光、情報，我地樣樣皆欠。過往講到港獨，即使身為本土派支持者嘅我地都會感到迷惘，冇一個清晰嘅路向，會諗：即使我地做咗呢樣嗰樣，上街抗爭，抗爭完，「然後呢？」。今晚嘅集會，正正為我地漸漸解開呢片迷霧，為定立爭取港獨嘅藍圖定立咗基石。

欣賞民族黨同陳浩天嘅，有幾樣嘢。一、喺選管會無理取消自己參選資格後，能夠沉得住氣，冇搞一場注定失敗嘅情緒宣泄抗爭。二、有大局觀，為港獨呢個看似遙不可及嘅目標定立藍圖。三，唔怕打破一啲固有本土派嘅「禁忌」，例如舉辦和理非非大台集會，開一個先例，令呢啲其實好教條主義嘅「禁忌」唔會為將來嘅行動帶嚟限制。

呢個集會精華之所在，在於結尾民族黨作出嘅「重要公佈」。「重要公佈」呢個涵頭目的係為咗吸引注意，實質上民族黨係想帶出一啲方針，一啲訊息，去為上述講到欠缺嘅資源製造一個解決辦法，去擴拓香港獨立或者整個獨派嘅勢力。支持向全港學生散播香港獨立嘅訊息，為未來嘅新力軍做好準備。希望獨派去選學生組織，為取得學生領袖嘅媒體發言權同社運影響力。鼓勵學生努力讀書，以為獨派建立健康嘅形象，同時增強日後獨派人才嘅影響力。最令人驚喜嘅係，民族黨敢提倡滲透政府，甚至警隊去獲取情報呢個講出嚟好易俾人屌嘅概念，佢地深明一個道理：喺各行各業都有內應，先可以最大限度咁為革命鋪路。

由今日起，本土派、獨派嘅抗爭不再僅僅係玩圍爐、玩內鬥，而係好似陳浩天所講，我地要晉升到「玩政治」嘅層次。我地做緊嘅，不再喺被動地對遭受嘅打壓去抗爭，而係好似孫中山搞革命一樣，主動去策劃一場變革，並為此開始著手準備。

呢一樣嘢，就係今晚集會嘅最大意義。