一年一度放榜，每個學生都會面對放榜－＞排Jupas（如果你分數許可，有得揀的話）－＞收／收唔到offer－＞要定唔撚要個offer既四大步驟。
無獨有偶，每年都總有班豬朋狗友，三姑六婆，係依個時候爭先恐後走出黎講依樣講個樣，整色整水，彷彿要成為你既人生導師。
而對住係accept or reject offer邊緣既朋友，我地懇請你地對住佢地講一句：「我屌你老母。」
你既人生，首先係要對得住自己。誠然，每個人對自己既出路總有唔同既考量，例如前途，錢途，興趣，社會地位，父母／朋友睇法等。但我覺得重點永遠應該放番係你身上，因為未來幾年讀書、考試，做Project、搞活動，識朋友、處理同面對問題既人，都係你。
至少我可以好肯定同你講，讀一科完全無興趣，唔鍾意甚至係厭惡既科目，係會感受到生不如死。有唔少人會同你講：「屌，你入到去咪再讀下鍾意既course囉，再唔係minor埋都仲得啦。」，如果你有信心能以此為據，行完大學四年，我恭喜你，因為你部份滿足到自己之餘，亦都滿足到個社會／身邊人既要求，得到入場卷沙紙一張。
然而，現實係殘酷既。你對住無乜興趣，又相對唔係咁艱深既中學課程，都只能勉強符合要求，得到一個唔係好想要既大學學位。咁又何解會覺得自己都可以完成到相對困難既大學課程呢？
有人同你講某d大學「易入難出」或者「易出難入」，如果你讀BA都可能係既，仲叫做有得你簡。但對於Engineering／Science既同學就係另一個故事，至少係我所相識為數不多既人之中，計埋自己，有四個係頂唔住／讀唔掂而執包袱走人。
望住畢業出黎超過20K既人工，對你可能好有吸引力。當下選擇一個唔鍾意既科目，不出幾年時間，可能就做到雙腳貼地，精神離地既偽中產人士，生活尚且無憂，勉強夠你供樓。但再之既五年呢？你又有無諗過？
兩個最常見而又無乜生產力既香港工種：你可以接受自己未來30年坐係Office度襟電腦做文書工作，又或者係做前綫工作，日日只要帶住老母返工就得？（咁其實份份工都要無時無刻帶定老母比人屌既）
唔少人接受現實，選擇左「可以」。
但作為血氣方剛，二十都未夠既年青人，已經係最無包袱既時間，連讀大學既選擇，最後發夢既機會都唔留比自己，又係咪有少少過猶不及呢？
古語有云：「你若對自己殘忍，等同幫別人含撚。」
如果此時此刻，你仲係為左考慮緊take唔take一個爛鬼offer而煩惱，請你問自己以下三個問題。
一.我想讀既科目係乜野？
二.咁我鍾唔鍾意依家個offer？
三.你厭惡依家依科嗎？
係弱智電影《龍咁威》入面，有一句對白係值得大家銘記：「唔準諗，即刻答。」一個最直接，從直覺而黎既答案，往往比你左度右度，反覆思量下得出既答案，黎得更加真實同正確。或者，至少係一個忠於自己既答案。
二十歲都未夠既你，如果要你花費一年重讀，或者用兩年讀個asso，去得到一個你心意既科目，你願唔願意？比「普通人」用多一至兩年既時間，拚盡全力，為既只係追求一個進入想學習既學科就讀既機會，咁樣既付出，你接受到嗎？
讀完大學，你既人生都只係過左四分之一，就算花多兩三年去追求一個小小既夢想，甚至只係一個機會，都係值得既。當你將你既人生拉均黎計，一年，兩年，只係一個好短既時間。反正最尾都有好大機會比社會同化，成為一隻港豬，何不比自己一個機會試多一次？
人生，其實係做出決定個刻，往往難以估計係岩定錯，只有事後睇番先知道。好似我咁，總共考過五次公開試，兩次會考，兩次高考，一次文憑試，荒廢學業試過、自修試過、大學讀過、U Board見過。而Quit U，係我既人生中當然都唔少得。
重考高考，有幸入讀某本港高尚學府，不過對於個課程仍然係零興趣，而心儀既科目，卻只夠資格入一間名不經傳既大學就讀。此時，耳邊傳黎家人既一句話：「讀你唔死既，出黎咪唔好做個行囉，入去玩左先。」
結果，就係咁碌左入去間高尚學府。入到大學之後，除左第一個sem，基本上都無撚係Lecture Room出現過，時間往往投放係其他事情上面，例如住Hall，上莊，搞活動，鳩Fling，補習等等。GPA既量值都唔洗多問啦，走個時我CGPA連1.0都無。
結果，搞埋大學d手尾，出黎做左半年野，發覺都係想完成自己讀某科既心願，行回頭路再考公開試，第二年(即係今年)日頭返工夜晚自修，結果終於入到五年前已經想讀既科目。
當中既過程「浪費」左四，五年，係大學既學術方面，收獲當然係永遠的零。但係「大學過程」中得到既野，可以話係畢生受用，甚至改變、塑造左依家既我。睇番轉頭，曬左幾皮野得到咁多經歷，係非常值得既。我恨既，只係當年點解無誠實面對自己，去選擇一條適合自己既路。
「有Offer，都唔好袋住先。」
謹以此文獻給所有十五十六，心大心細既應屆考生。