由唔知幾時開始，pokemon go左下角嘅等級值變成咗宅男、毒女指標。
同人出到街，唔洗講野，只要稍一眼左下角佢幾多lv，已經知道佢係咪宅男毒女。條公式係點呢？就係「等級」同「宅」成反比：等級越低，代表宅毒指數越高，反之亦然。點解咁講呢？隻game要點先高lv呢，就係要出街，等級越高代表住你行街行得越耐。每位精靈訓練員都以為自己係小智，離開純白鎮（屋企）展開冒險。冒險？作為真毒撚連冒險樂園都唔會去啦，莫講話行出街捉比卡超，結果一班宅男就一如以往哩晒喺屋企，只可以喺捉屋企嘅波音蝠同綠毛蟲，等級都唔會高得去邊。
呢隻game根本恰死毒撚，我作為足不出戶嘅廢青，其實升唔到lv，所以每次俾朋友問我幾lv我都好驚，好驚俾佢地笑我係個低lv宅男。另一班本身沉迷打機嘅人，逐漸由屋企走上街頭，由不問世事嘅毒撚進化成四出探索嘅人。或者你會話：「車！出到街咪又係耷低頭打機！」咁你就錯啦，即使係毒撚，都係單純、熱血、富探險心嘅毒撚，至少佢地肯為一隻小精靈踏足港九。3-8Lv嘅人係宅中之宅；9-20Lv嘅係潛力股，因為手持三幾球luck egg；21Lv或以上已經係男神女神嘅陽光型訓練員了，簡單講，高lv嘅人，陽光、健康、活潑、好動，係最佳筍盤。
同人dating，初次約會，想知對方為人係點樣？乜都唔洗理，問下佢幾lv就ok。如果低lv，即係話呢個人平時都冇咩戶外活動，連捉怪都冇心冇力懶出街，又點會肯花心思同你去街街呢？
見工咁又點呀？再唔洗interview鳥，叫求職者開隻game出黎碌一碌，性格自有分曉。高lv嘅人唔只代表進取冒險陽光型，仲標誌住有一定嘅社交能力。唔少人應該都試過，落到街，大家素未謀面，互不相識，但係都可以打開話題，出色高lv嘅訓練員係會禁禁下機走去撩下人有咩捉，又會話俾人知邊度有啟暴龍、邊度有鯉魚龍等等，佢地掌握住第一手情報，同時熱心分享，簡直係人類典範，公司好需要呢啲人材，一見到係高lv，已經唔需要多講，即刻入房簽約。
所以話，等級同宅毒已經成為咗既定反比關係，高lv即係常出街，宅極都有個譜，如果見到朋友好低lv，你可以大條道理指住佢地叫聲「宅男」或者「宅女」，睇而家個潮流，pokemon go從此將成為察人新指標，此乃一望左下角，宅毒辨分明也。
利申：其實唔多玩，勿認真。