立法會會期完咗一個月，不如回顧一吓咁多位議員嘅表現。我哋首先睇吓咁多位議員多唔多射波先？
筆者首先喺立法會網站下載咗第五屆立法會嘅投票紀錄，再從中統計吓各位議員有幾多日有返工。筆者用咗一個比較寛鬆嘅計法：如果呢位議員喺投票日有無投過票，不論只係投咗一次定係一百次，我都當呢位議員有返工。我亦都用咗紅綠藍三色代表建制、泛民同其他議員，三色分類取自中文維基百科。
（所有圖片按圖可放大）
我哋首先睇吓立法會投票日出席紀錄：
劉皇發議員係今屆立法會嘅射波王，出席率只有兩成八。梁家騮議員就緊隨其後，出席率大約有三成七。
反觀最勤出席嘅頭十二位議員，都屬於建制派議員。唔知係因為泛民議員嘅戰略性拉布，定係真係唔夠建制勤力呢？
各大傳媒又唔多報導立法會其他委員會嘅新聞，橫掂立法會都放咗財務委員會、人事編制小組、同工務小組嘅投票紀錄。我哋又睇吓各位議員喺呢D屬會入面嘅出席情況？
（大佬，我呢Ｄ小市民，都想知呢班議員有無代表我哋，入呢Ｄ小組管錢㗎？）
財務委員會投票日出席紀錄：
射波王都係梁家騮議員同劉皇發議員：梁議員出席率僅過一成，而劉議員出席率就有兩成三左右。而方剛議員，郭榮鏗議員，湯家驊議員，以及林大輝議員出席率都未過五成。而最勤出席嘅頭十位都係建制派議員。
人事編制小組投票日出席紀錄：
射波王係郭榮鏗議員：無出席過。
而總共有十三位議員出席率低於五成，當中有八位屬於泛民主派，四位屬於建制派。最勤力出席嘅頭十位，有七位都係建制派議員。
工務小組投票日出席紀錄：
田北俊議員出席率只有兩成半，成為射波王。至於射波唔錯嘅梁家騮議員，出席率就有三成。出席嘅頭十二位，只有三位係泛民主派嘅議員。
寫到最後，我想問多一次：點解最常出現投票嘅，好似建制派議員比較多呢？
（2016立法會所有候選人名單請參閱維基百科）