「青衣海傍係一條L型嘅長路，由東北公園到青衣碼頭，有超過20個Pokeshop，我哋由其中一邊開始跑，沿途收集精靈球，順便跑返個靚步，係咪好好提議先！」我約肥仔文跑步，十次有九次無到，今次主動約我，重要準時出現，因為有得執精靈球。
我無預左今日跑步要玩埋Pokemon GO，我都有account，但因為我份人懶得行，而落街跑步又唔想拎電話出黎，跑下停下咁，又怕唔睇路撞到人，所以我個人得11 Lv，捉得三十幾種精靈，同人哋講自己有玩開，我怕人哋笑而不語。
「唔怕喎，依家十點半，重要weekday，咁大太陽，啲人都喺屋企涼冷氣啦！男人老狗唔好咁婆媽！跑就跑！我今日有態呀！」肥仔文成一百八十磅，依家個太陽大到佢未跑已經出緊汗，重一副自己好跑得咁嘅樣。
我睇一睇周圍，朝頭早又真係無乜人，還掂都出左黎，咁跑幾多先？
「拿，唔好講距離咁掃興啦！我哋每經過一個Pokeshop，就拎一次道具，提子同埋補血嗰啲唔計！直到我哋嘅精靈球拎夠先叫跑完！你依家up個數丫。」仆街跑個步都要說明，肥仔文肯定近排唔夠波又唔想課金。
「100？」當20個Pokeshop，開一次平均3 – 4個精靈球，計埋有時黑仔拎埋啲唔等洗嘅野（比抽提子我拎撚左要掉嘅！）當一個來回四公里，預兩個來回差唔多，我都唔係好跑得，而且肥仔文唔係成日跑，忽然Chur咁盡我怕要幫佢叫白車。
然後肥仔文用一個好歧視嘅眼光望住我，我知道佢覺得呢個數目太少，但講有邊個唔識講姐，真係要跑架！要培養習慣，量力而為好重要，如果太辛苦，第二日就會想放棄……
我望住佢，開口講：「喂大佬講左要跑架……」
就係呢個時候，佢無啦啦痴左線大叫：「望咩呀！我大你一百個精靈球呀！」佢用一個「望乜撚野」嘅語氣拋窒我，我有啲覺得委屈，摸摸個身，又無帶瑞士銀行本票，兇唔返轉頭，只好講一句：「……你講完跑唔晒你都要行埋佢呀。」
肥仔文即場拉筋，一副今日全港我最跑得嘅樣。我真係唔知Pokemon GO咁大魔力，可以將一個賤肉橫生嘅肥仔對運動充滿希望，總之就開跑啦，200個精靈球。
因為拎住部手機中間要開Pokeshop同轉嗰舊死人野都要花少少時間，我哋泊埋一邊跑，費事撞到人。Pokemon GO有個好處，就係轉完其實唔洗執波，直接出返畫面都會當收到啲精靈球，肥仔文跑喺我前面，不斷催我：「快啲啦……唉我跑慢啲，捉住精靈等你啦！」
其實真係唔怪得我，佢真係以短跑嘅速度黎衝刺，戇鳩嘅程度直情令我懷疑佢係未落街跑過步。我為左趕上去，提左速，並且無視所有見到嘅小精靈，我哋跑完兩個來回，都未有一百個精靈球。最大嘅問題係我地跑完一程，原路返去嘅時候，岩岩開過嘅Pokeshop未回好，所以實際拎到嘅波係少好多。
我已經喘晒氣，肥仔文塊面紅晒，扯晒蝦，係咁咳，就快往生嗰隻。
「跑唔晒都要行埋佢呀。」我其實都有少少頂唔住，但見到佢咁辛苦，基本上我係睇住佢黎食。作為一個好朋友，好應該見到對方想投降嘅時候，提醒佢再次加油！
精靈球丫拿！
「……嗯，咳咳……我……咳咳……」肥仔文同我已經半行半跑，佢連野都講唔出，此情此景，我除左恭喜，都真係唔知講咩好。
又再跑左陣，肥仔文連手都舉唔起，我哋都未跑到三個來回，岩岩集齊百零個波，我無課過金，道具欄已經爆左，我見佢好似好陰公，正午太陽又大，我成個人都好似扯到乾晒咁，再跑落去，我真係怕往事如走馬燈般一一湧現，然後斷線風箏會直飛天國。
「算啦，返去啦，無謂互相折磨。」買水飲好過。
肥仔文聽到我咁講，即刻停低泊埋牆邊，扯住蝦，二話不說嘔出黎，噴晒落地下。我望住佢，原來佢一直都忍得咁辛苦，作為佢嘅好朋友，第一時間當然會諗……
仆街嘔落地下洗唔洗罰千五架！
好彩佢係一個姿整嘅肥仔，隨身帶備紙巾，清理返自己嘔出黎嘅野，我都喺附近買左支水比佢洗一洗個口，我拍一拍佢膊頭鼓勵，始終佢行下跑下都有十公里左右，對一個成日做文職涼冷氣嘅肥仔，都可說係一個突破。
「呼……我無事架啦……我哋不如用埋啲波先返去丫？」肥仔文抖順條氣，一開口就係呢句說話，然後我直接唔等佢返屋企。
我真係覺得，只要呢隻Game肯同啲體育廠商搞啲競步或者長跑活動……
香港從此無肥人。