估唔到一隻手機Game 都可以看盡人生百態。有人只求儲齊曬成套圖鑑，有人千方百計要捉最勁嘅寵去打道館；有人玩兩玩就嫌悶，但亦有人好似求其花咁講，為咗去Pokestop拎精靈球而落街跑步，仲跑到差啲出事……
我就冇大家玩得咁瞓身，咁耐都未試過𥄫住精靈地圖咁玩，所以捉啟暴龍嘅機會不是屬於我的，手上最勁嗰隻小𥼃靈只係大呆獸。其實開頭以為佢傻頭傻腦實係好廢，但用落又發覺幾有驚喜喎。加上係自己一手一腳升上去（小呆獸都算常見，儲糖唔難），雖然唔係最打得，但擁有佢我已經心滿意足。唔係講笑，原來一隻咁嘅Game 都可以培養出真感情。
越嚟越多人捉小精靈嘅同時，亦開始有人將第一季嘅動畫片段剪出嚟放上網，相信傻鴨同小呆獸相遇嘅一幕好多人都重溫咗。我都特登搵返嗰一集出嚟，希望睇吓小呆獸係點進化成大呆獸，對自己隻小精靈有多啲了解。相信你哋都仲記得，只要小呆獸畀貝殼怪咬到條尾就會進化成大呆獸。動畫入面仲講到，小呆獸係靠尾部重量平衡先可以企起身出拳，而貝殼怪亦係跟住小呆獸先可以四圍去。呢種就叫共生關係。
唔，我Bio就最差嘅，但估唔到連小呆獸都識咩叫共生。呢個世界好多嘢都係咁運作，就連兵仔教女神捉稀有小精靈都係一種共生。兵仔可以得到同女神相處嘅機會，啲回憶夠曬佢拎返去慢慢／晚晚J；而女神亦得到想要嘅寵嚟向班姐妹炫耀。睇吓，我有背背龍呀！嘩，真係連中國都冇你咁「兵」力強大呀，航空母艦好叻咩？咪又係飛機場一個，你夠有啦。
講返轉頭，其實共生嘅例子仲有好多，董伯伯都講過「香港好，中國好；中國好，香港更好」，背後何嘗唔係一種共生嘅概念？曾經香港人都信過呢一套，但係回歸就嚟廿年，大家慢慢發覺成件事根本唔係咁。「呀爺」拎香港嚟洗黑錢洗得有幾好我就唔知，但香港人生活肯定係越嚟越唔好。
中國呢隻曾經畀世人恥笑嘅小呆獸今日終於站起來，但香港呢隻貝殼怪所含住嘅東方之珠已經搵唔返（唔通因為進化咗做螺？sosad）。當共生變成「共」生，啫係得共產黨生嘅時候，香港人企出嚟反抗就係理所當然啦，係咪？