呢排成個facebook 都係討論傅園慧，話佢係鏡頭面前，好直率、可愛咁對答，又表現得好謙卑，仲話自己得到第三已經好開心，同大家一向係鏡頭前見到的中國運動員，形成強烈對比。好多人更將佢同孫楊比，話呢啲先係體育精神。我本身都同主流聲音一樣，覺得傅園慧好特別的，好似從來未見到大陸人可以係鏡頭面前咁真誠講野。
但由佢開腔力挺孫楊個刻，我對佢徹低改觀。短短幾日佢成為國際的網絡紅人，贏晒民心，傅園慧對國家來講，已經唔只是一個選手咁簡單，佢係一件輿論武器，既然人地將佢同孫楊比，我就順勢推舟，將傅園慧的like撥埋畀孫楊，都是中國人，不用分得那麼細。
如果你質疑我的陰謀論，話傅園慧是真心撐孫楊的話，我對佢仲失望。如果佢係聽國家話，咁都可以話是人在江湖，身不由己。但如果佢係真心出來撐孫楊，就代表大部份大陸人都唔能夠批判思考，都唔好話爭論到底孫楊有無騷擾對手練習，但係佢夠膽死係鏡頭面前話唔識mack horton，話自己是新世界。其實都係因為佢誤以為網上大把人幫佢攻擊對方，有13億人幫自己撐腰，誰怕誰。
好多本土人即刻衝出來，叫大家唔好掛住睇大陸選手既野，望返香港選手有幾博命。之後就有人出來反擊，「下？淨係可以支持香港人，而家邊個玻璃心？」係，梗係無人唔畀你支持中國隊，j寧澤濤。但係如果你會因為佢地拎獎而感到驕傲、自豪，咁香港隊？土生土長的香港運動員，缺乏政府、社會支持，辛辛苦苦訓練左咁耐，去到16強止步，無人知你乜水，大家淨係記得吳敏霞拎左咁多面個人金牌。
個感覺就好似你個仔去朗誦比賽，你掛住睇個人地個仔有幾勁，唔理你自己個仔，見唔到佢係最後一秒有幾辛苦衝刺背稿。結果可能佢入左semi final已經出局，行唔到上個台拎獎，但係佢盡左自己最大努力，突破自己，就好似混血女飛魚何詩蓓成為首個躋身奧運女子游泳項目16強的香港人。不過你望唔到，你只是望其他在台上拎獎的小朋友。「喂，我有自由鍾意其他拎獎的小朋友掛？」係呀，你有。不過你個仔會好唔開心，覺得自己得唔到獎，就得唔到媽媽的支持。
其實唔係，贏唔贏好閒姐，你上台個刻，你永遠都係最好個位，感覺是好主觀架啦。以下是香港今屆里約奧運代表團的名單：
田徑：陳銘泰（跳遠）、姚潔貞（馬拉松）
羽毛球： 男子單打：胡贇、伍家朗；女子單打：葉姵延 女子混打：潘樂恩、謝影雪
混合雙打：李晉熙 周凱華
單車：公路賽：張敬樂 場地賽：李慧詩 梁峻榮、刁小娟 山地賽：陳振興
劍擊：張家朗 、江旻憓、連寶香
高爾夫球： 陳芷澄
划船： 趙顯臻、鄧超萌；李嘉文、李婉賢
滑浪風帆：鄭俊樑、盧善琳
游水：謝旻樹、鄭莉梅、何詩蓓、江忞懿、劉彥恩、歐鎧淳、施幸余
桌球：唐鵬唐鵬、黃鎮廷、何鈞傑、杜凱琹、李皓晴、帖雅娜