（photo via cc Flickr user Kevin Poh）
如果我可以向上帝許一個願，我會雙手合什，虔誠咁講……
「街場犯規可唔可以射罰球呀！」
次次同街場阿伯打波，我指籃球，最後一定變中遠距離嘅射波大賽。因為你係永遠唔會用技術或者速度過到任何一個街場阿伯──你喺走兩步半同入籃底之前佢一定會犯左你規先，具體行為多數係一野大大力辣落隻手度，或者就算你食晒腳位，佢都會直接打橫cut過黎撞開你。
而佢哋係好清楚自己犯緊規。
我依家係講緊識打波嗰啲阿伯，佢哋對打五打五全場有種瘋狂嘅愛好，就算得一個場四十個人跟緊隊佢都會屈晒其他人打全場，OK Fine呢個問題都唔大，唔知係咪大多數阿伯都身經百戰，以前打好多聯賽定點啦，佢哋會將比賽嘅concept套落普普通通嘅街場三打三──知道嗰球必入，就一定犯規。
你剷過佢，或者籃底食佢腳位轉身，總之入到顏色區，佢都一定會即時犯規，走完兩步想抽起個波上籃嘅時候，一定會直接辣一野勁嘅落黎，十之八九淨劈中手，有次真係痛到成個手背痺左，個阿伯重用得逞嘅口吻講：「無計架，你知啦我一定要咁。」
喂大佬，大家出黎打波，身體碰撞一定有，但係出面比賽比人犯規起碼有罰球射丫，你係咁犯規要離場架嘛！依家街場啲犯規自己Call，之後就重新開波，你下下咁打，搞到無人敢突破，淨係同班阿伯鬥射外圍。
射得贏都重好，嗰日手感差射唔贏，要出場等跟隊，望住自己雙手比人打到好似豬手咁，間中加兩三條比人抓傷嘅血痕，好好玩呀！？
有時唔係話小圈子唔受阿伯玩，而係佢哋真係只係跟佢地自己嗰套規矩黎玩，街場阿伯得兩種，一係打斷你對手都唔覺得自己犯規，一係打斷你對手然後話無計籃球係咁打。
Sor 9 ly都無句。
講真，我寧願比甲一、甲二、乙組、區隊甚至青苗炒蛋，都唔想同阿伯打，起碼輸得心服口服。