近日嘅太古事件，相信好多人都會諗，若果當日在場，遇見友人被挑釁，又有幾部手機拍攝，應該點樣幫到佢？
呢件事，令我諗返起以前仲係中學雞，學校附近嘅球場經常會同同隔離學校嘅學生打交。當年未有智能手機，無人會拍低罪證，但兩間學校嘅老師，周不時會喺暗處監視。
老老實實，老師唔會理邊個出手先，只要一見到郁手就會衝出嚟捉你返學校，送你大過一個。但我品學兼優前途無可限量，打交又唔叻，又怕流血，但見到朋友有難，無理由唔幫嫁～
有一次，我見朋友被隔離學校挑釁，於是立即除低件校服走埋去。不過我無幫手打交啊，而係企喺隔離學校嘅同學後面，大嗌：「大佬！使唔使幫拖？」
佢回頭用疑惑嘅眼光望住我…
我只好補多句：「你最近跟咗黑社會大佬，不如吹雞啦！」
對方無理會我，仲開始同我朋友糾纏起嚟，我只好雙手環抱住佢，大嗌：「唔好打啊大佬！一陣畀老師見到，搜到你身上包煙就大鑊啦！」
喺我緊緊環抱住佢嘅途中，我朋友好快手咁趁機塞咗佢幾拳。
呢個時候，對方學校嘅老師衝咗出嚟，個老師問我：「你係咪我哋學校嫁？」
我答：「唔係啊，我跟大佬咋！」
最後，老師就一手揪住個學生件衫，捉咗佢返學校。
呢個故事雖然講唔出咩大道理，但其實講咗好多大道理。
下次見到朋友被襲，記得走去對方嗰邊嘅陣營，
不要說：「夠薑過嚟隻揪。」
而是說：「大佬，使唔使幫你吹雞？」
不要說：「你邊撚度嫁？」
而是說：「大佬，警察嚟到，搜到你身上包粉好大鑊，不如忍一忍啦！」
不要對著拍攝手機說：「影乜撚嘢。」
而要說：「做得好，大佬！打佢！大佬好嘢！」
不要遮擋鏡頭。
而是說：「大師兄嬌喘一聲倒在外賣仔嘅懷裡，喺呢個時候，大師兄眼如微絲，濕潤嘅雙唇，微微張開，口中噴出有如蘭花一樣嘅香氣，對住如斯尤物，佛都會動心啦。」
盡量讓手機錄下你的聲音，令整條影片變成搞笑片。
記住啊！千祈唔好出手，打交流血好痛嫁！
香港人，應以和平、理性、非暴力解決問題！
正所謂以和為貴！促進經濟嘛！
（編按：大佬，警察到時會唔會拉埋你話你自稱三合會成員架～）
＝＝＝＝＝
最新出版：《港產童話》《如何激嬲女朋友而不失霸氣》