（photo via cc Flickr user Reiner Girsch）
兩個人相識，最難就係開口講第一句。中文又云打開話題匣子，聽落無乜野，但係對於有Ｄ人黎講，可能果個其實係一個夾萬黎，難過登天。英文叫Break the ice，就傳神好多，破冰喎大佬，你估真係咁易？
但如我地既毒Ｌ朋友較早前既經歷，其實佢已經過左呢個最難既一關。因為佢地係雨天相遇，不特止，仲要係老土到遮完佢一次之後再度重逢喎，呢Ｄ咁經典既韓式劇情，又點可以錯過呀（我覺得）。但問題又黎喇，如果想拎個電話號碼，又係咪真係仲係好難？女方如果聽到男方問，會唔會覺得突兀（有興趣者歡迎留言俾毒Ｌ朋友參考）。
其實遮過一次都算係緣份啦。我假設女仔如果對你第一印象都唔好，佢根本都唔會搵你遮啦，寧願搵第個唔好？（除非果陣無得揀ＬＯＬ）如果已經係途中係有講有笑既，我覺得都叫做有計傾，臨道別時拎個ＣＯＮＴＡＣＴ做下普通朋友仔先，都真係唔係咩大不了。識多個人渣嘛（ＯＲ等佢識多個「人渣」嘛）。最緊要問果陣夠自然，同埋已經有食檸檬既準備。有咪大方抄牌，無埋人生匆匆就此別過，淡淡交會過各不留下印囉～～
我係女仔我都唔會選擇唔俾。因為即使你有我Whataspp 又如何？我又睇死你唔會真係打黎，你有ＭＳＧ我都可以唔覆。你食左幾次悶棍，自然就知難而退架啦。同埋對方咩來路你都全然未知。有無男朋友？女神級？收兵團？哈哈。所以我奉勸下次毒Ｌ朋友唔需要諗太多。等於你如果你想知人叫咩名都要等下次的話，你都係繼續玩守株待兔模式罷啦～直接得分唔岩你～～