我花三十零秒睇完最後一話，長長吁出左一口氣。
此時此刻，再去追究係唔係腰斬，已經唔再重要，無論如何，呢個亦象徵左少年ＪＵＭＰ既另一個時代既終結。我諗死神都可以納入一個另類經典：就係由一直排名三甲，可以同火影、海賊王相提並論既王道神作，結果去到後段，俾人插到變地底泥，甚至以一話用幾多秒黎閱讀去鬥快，作為唯一可以討論既話題。死神真係曾經輝煌過，我見過，我真係見過，甚至係讀大學果陣，廢寢忘食咁追晒成個藍染叛變篇。呢Ｄ咪就係少年ＪＵＭＰ標榜既青春囉：
曾幾何時，大家都稱讚作者久保帶人畫功進步，而且愈畫愈好；
曾幾何時，大家都驚訝佢鋪排劇情既緊湊感同埋角色既描述；
曾幾何時，大家都覺得Ｄ伏線真係做得一絕，尤其是藍染叛變果下，所有人都始料不及；
曾幾何時，大家都期待邊個既斬魄刀可以卍解；以部分未曾見過斬魄刀既隊長既形態會係點，更加係好多人一直津津樂道既話題。
但久保同好多畫王道漫畫既人一樣，佢犯上左一個致命既缺點，就係高潮過後，劇情無以為繼，然後角色既能力開始出現愈黎愈大既差距，一整套能力系統完全失衡，結果變成你秒我我秒你既情節，不斷出現。
本來佢苦心經營既世界觀，死神，虛，滅卻師，各種各樣既命名，靈壓，道具，鬼道，瞬步等等，都係一個極度複雜既戰鬥系統，可以同火影有得揮，只要佢地可以好似全職獵人既富奸咁，識得鬥智，玩戰術運用，就已經好睇。但偏偏，後期變晒質，完全係一個招式冚一個招式，秒完就算，仲要成日講晒Ｄ操作俾敵人聽，真係好戇鳩。同後尾火影寫輪眼無解釋玩晒一樣。咩都打血統，仲練忍術做咩鳩？久保又成日玩分鏡玩到走火入魔，為左追求美感，倒瀉兩三頁墨水全黑都夠膽死……
救露琪亞果篇，真係完全無咩可以挑剔。但之後無啦啦織姬又出走去虛圈，結果又打十刃打多轉，完全倒模照ＣＯＰＹ，都算喇。起碼到最後藍染都打低左，一護失去死神能力咪算囉。好啦跟住無啦啦整個現形術出黎又拖左陣，但到最後無咩交代又搞到一護變番死神，果度已經睇到人開始燒書，更加唔好提之後打星十字團同埋友哈果度。阿豬阿狗都識卍解，日番谷不斷被秒，之後連總隊長都被秒，然後一直講到零番隊好很勁，佢地最後關頭出現，但係都係被秒……
結果死神就係不斷秒黎秒去秒到最後幾話。即使係最後大佬，都係被秒架，跟住就趕收工生ＢＢ大結局。可能真係被腰斬啦，之前埋既伏線，係接近完全無理。阿魂呢Ｄ更加提都無提，茶渡果堆凡人一早變左路人。至於阿變態開發局長之前倔左果Ｄ滅卻師身體又代表左乜，當然亦都無交代。其他好多好多既例子，數之不盡。久保將個坑愈挖愈大，到最後唔識收科，連自己都埋葬埋，佢既ＦＡＮＳ只好就同佢一齊陪葬。
再強調多次，寫長篇故事，控制力真係好重要，開左個頭唔識收，就係會變左死神咁失敗。追晒死神，真係好想講番句粗口作休止符。咁都拖到六七百話仆你個街。仲話之後有續篇，真係ＳＯ９９Ｙ呢Ｄ咁既野，像毒品，不可一不可再。
人生有幾多十年？我番睇番龍珠好過喇。