無視，是比歧視更殘酷的武器。
要改變，就要談論，不停不停談論。
如果說LGBT (Lesbian, Gay, Bisexual and Transgender)被社會歧視，I就是被無視的一群。
I是什麼？
I stands for Intersex，亦即是雙性人——
出生時同時擁有男性和女生的性徵，既非男、亦非女。
（留意番，雙性人不同於跨性別者。跨性別者生理上能被清楚界定為男或女，而心理性別與生理性別相反。
例如Danish Girl嘅Lily，生理上擺明係男人，但心理上佢相信自己係女人。所以Lily係跨性別者，唔是雙性人。）
由於本身性/性別就係我關心嘅議題，加上好喜歡戲劇，星期日，參加咗一個以雙性人為主題嘅drama workshop——
雙性人生命歷程工作坊 Intersexuality – The Way We Grow。
本來於我而言，雙性人就沒什麼好奇怪，就是性別光譜中的一環。
但原來，就算本身唔歧視性小眾嘅人，都有唔少人分唔到雙性人同跨性別者；
原來，大約1500人當中就有一個雙性人——即是如果你facebook friend list多過1500人，好有可能當中已經有雙性人；
原來，現階段嘅香港，只有一位公開come out嘅雙性人，係只有一位。
好喇，雙性人喺日常生活中會遇到咩困難呢？
喺個workshop入面，有好長一部分會畀我哋代入一位雙性人——Denise嘅角度，嘗試去經歷、感受佢嘅掙扎。
廁所去男廁定女廁好？
校服/制服著男裝定女裝好？
見工CV填男定女好？
運動比賽係男子組定女子組？
好喇，身分證係男仔，但明顯有對波，點算好？
身分證係女，但生鬚，點算好？
個個雙性人嘅情況都唔同。
有人偏男、有人偏女，而男女性徵／染色體嘅比例，因人而異。
換言之，世上冇兩個雙性人case係完全一樣嘅。
但係，喺呢個性別只有二元劃分成男、女嘅社會，世人根本睇唔到佢哋、唔會討論佢哋；而雙性人如果佢自己唔講，你都好難察覺佢係雙性人——佢哋等於係社會上嘅隱形人口。
要幫助雙性人，首先要令佢哋不再隱形——我哋要去討論雙性人。
有歧視嘅聲音，就有機會去批判、去說服、去感召反對嘅人，重要的是要畀雙性人知道——即使有人歧視，同樣都有人支持。
講番個workshop，有一part係實況劇場——
喺學校入面，作為受壓者嘅雙性人同學，被施壓者嘅訓導主任同社工逼迫，冇權冇say嘅新老師作為旁觀者，可以點幫到受壓者？
唔單止係學校環境，放遠四海組織皆適用。
好多時，我哋表而上係對抗緊個高層，但實際上係對抗緊成個制度。
作為一個冇say嘅小薯仔，千祈唔好咁傻豬豬單人匹馬向前衝，空有匹夫之勇卻欠謀略，然後畀人五馬分屍壯烈犧牲喇，世界將依然不變改，施壓者只會增高加厚逼迫受壓者幅牆；而受壓者亦失去一個本來可能可以依靠嘅對象呀。
小薯仔要號召更多更多小薯仔，用群眾力量去起革命才是出路。
我講緊雙性人，又唔止雙性人。
頭先講到，香港宜家只有一位公開身份嘅雙性人，就係合照中嘅呢一位——細細老師。
細細老師宜家五十出頭，小時候做過廿幾次手術，做咗三十幾年男人，先知道自己係一個雙性人。
同佢差不多年紀嘅雙性人，佢知道嘅，全部都自殺死曬，係全部。
我聽到嘅時候好震撼，一句輕巧嘅話，背後嘅歷史係何其沉重。
雙性人每日面對嘅，絕對唔止去男廁定女廁好，或者CV填男定女好。
而不論任何弱勢社群，需要嘅唔係憐憫嘅目光，而係援手。
所以細細老師好鼓勵世人同佢影相，喺社交平台畀大眾知道：「我見過雙性人，我關心雙性人，我支持雙性人。」
歧視和欺壓源自無知，多一個人表態、多一個人幫手教育，雙性人就多一分力量。
可以的話，我唔想無端端話我支持同性戀，正如你唔會無端端話你支持異性戀；同樣地，我都唔想無端端話我支持雙性人，正如你唔會無端端話你支持男人同女人——眾生皆人類，生命皆平等。
無論咩人，咩生理狀況，係唔係小眾，都應該作為一個獨立嘅個體被正視。
喺無端端嘅情況下，刻意嘅支持其實同打壓一樣，都係一種標籤。
但當有啲人無端端都被歧視，就不能沉默了。
要normalize任何所謂禁忌，就要係咁講係咁講係咁講，將呢件事滲透到我哋嘅normal life中。
直至有一日，我哋唔駛再話畀人知自己支持性小眾，但在那之前，讓我們不停去談論。
第一步，以後說到LGBT嘅時候，喺後面加番個I——LGBTI。
延伸閱讀：
如果你想知多啲關於雙性人，可以睇下呢兩條片——
南都周刊：https://vimeo.com/147355811
鏗鏘集：https://youtu.be/-CD2RhpNgLc
籌辦是次drama workshop組織page： 雙性人 The Missing Gender 0.972
細細老師的page： 藩籬以外 ﹣ 認識和關愛雙性人