（圖片經過處理，絕對唔係選舉廣告）
唔係冇。我見到有，仍然有，不過都係啲無名無姓嘅人。有班人本身默默咁貼label、摺傳單、出街站、向親友拉票…冇人知佢哋姓甚名誰，但佢哋都盡力做好自己嗰份。然後望住啲人私乜私乜上腦（唔使分咁細，全部都係私心，都係自撚私），啲nobody都開始唔知自己咁辛苦為乜。
有名有權有力有say嘅人，總係太多agenda。難為了啲仆心仆命嘅義工/支持者。
我唔敢講話邊個邊個一定係為私怨先會做啲乜乜乜，只係好多時就算唔係帶住私怨，都係為咗私欲。都係私心。
然後聽到唔同嘅人暗地訴苦：「開始唔知咁辛苦為乜。以為大家各自喺唔同位置努力，真係可以壯大到本土派。而家真係唔知當日仆心仆命付出咁多甚至押上咁多係為乜。」
唉。
對制度、議會失望就不嬲，而家再對好多人都好失望。我開始連票都拉唔落，冇力拉，因為連我自己都唔信唔buy唔認同唔欣賞嘅，我推介唔到俾人。原本我最想支持嘅係民族黨陳浩天（雖然我唔係新西選民，但我本身諗住幫手做nobody咖嗚嗚嗚），而家我都會繼續睇遠啲。希望仲未死心嘅人都唔好淨係睇六日後嘅選舉（因為結果一定係令人揼心，睇埋九月五各方嘅評論應該會爆血管），睇遠啲，放長線，揼石仔。
大家而家咁嘅素養修為，真係俾我哋推翻到中共都嘥鳩氣。我係話在座各位同我一樣都係垃圾，個個都管治唔到香港。癲狗餓狗廢狗，個個都想香港死。
Parker Palmer有本書叫《民主：心碎的政治》，我未睇晒（睇咗兩個chapter算好好咖喇，我都唔睇書嘅），但我記得其中有部份講到，要建構一個民主社會，唔係單單講緊個制度改變，而係人民都需要有民主素養。而家我哋明顯冇，好清楚，係冇。
我一向都話「沒有誰比誰更高尚，只有誰比誰更高章」，政府污穢黑暗我知，但「不嬲都知」唔等於而家見到會唔想嘔。