（photo via cc Flickr user Ian….See）
雞絲姐姐今日勸勉幾個後生仔：「你真係當人係朋友嘅話，有咩唔認同、唔滿意，最好嘗試私下搵佢講咗先。可能佢會講佢嘅苦衷，你聽完會明白佢處境多啲；又可能你會開闊咗佢嘅諗法，左右到佢嘅做法。即係咁，假設你而家其實對我好失望甚至好嬲，所以暗啞底決定咗唔會再同我有任何交集，然後忍到某一日你終極大爆發喺公海屌柒我…我第一個反應會係好嬲，因為好冇面，你咩都冇同我講過就拎晒啲嘢上檯面好似要世人公審我咁；第二係我會好傷心，我當你係朋友以為大家可以坦誠溝通，點知原來你一直覺得我行緊錯路都冇過出聲冇勸過我，只係睇住我繼續深入你心目中嘅歧途，到我再返唔到轉頭時你就出嚟同大家一齊圍屌我孤立我…」
相規以善好重要，真係好重要。唔好下下假設「屌佢而家痴晒線咁我講咩佢都唔會聽咖啦，咪盞俾佢屌返轉頭」，就真係唔再同嗰啲你原本當係朋友嘅人對話。如果你真係當人係朋友，點解唔肯開聲私下問一下勸一下俾機會佢解釋一下？朋友之間總帶著愛，而愛就係取捨。你怕俾朋友鬧返轉頭面懵懵多啲，定怕朋友深入歧途返唔到轉頭多啲？你嘅面子重要，定朋友嘅將來重要？（如果嗰個從來唔係朋友，咁又另話啦。）
「朋友之間相規以善，故彼此可和而不同。朋友之道，重在互尊其所以異。故朋友之切磋，即所以培植人之寬容異己之精神。」諗一諗，再諗一諗，民主精神其實都不外乎咁。如果你連靜心、虛心、放低前設咁聽朋友講嘢、了解佢行事背後嘅考量同動機都做唔到，你其實同你日日夜夜鬧嘅港豬無異，都唔係幾配有民主。:(