（photo via cc Flickr user Alan Antiporda）
返工是不能避免的，除非你好很夠POK。因此，喺公司扮有嘢做也是不能倖免的，除非你好很有料。於是，為了保住飯碗（或者更高層次 —— 搏表現），每個打工仔都需要學懂辦（扮）公。
第一招： 千方百計縮短工作時間
假設你返九放六，老闆遲返是常識吧，所以你可以自動調節上班時間，九半到達，邊食早餐邊睇Email，咁就十點；下晝三點三去Pantry沖杯奶茶嘆吓；臨到五點九，所有機器準備停止運作，Save低D文件預備熄機，再去個廁所，整理行裝。記住，絕對唔可以喺屋企開大，因為返工時間去廁所係人權，喺公司時間開大就慳咗大拿拿十五分鐘！
第二招： 無論上網睇咩都用Word
喺公司間唔中上吓網就大家都明，但老闆同事成日出出入入，用Alt + Tab切換畫面都轉唔切呀，睇到你游手好閒始終唔係咁好啦。所以呢，無論你係睇財經新聞捕住個市，定係睇旅遊Blog Plan定下一旅程，都可以考慮Copy成篇嘢落Word慢慢睇，或者直接Print出嚟睇，老闆行過見到仲真係以為你咁多文件要做，加分。
第三招： 用Email同Friend傾計
問晒D老死姊妹拎公司Email，開個Email Stream，瘋狂傾計分享淘寶睇波Link，都仲被老闆以為覆緊工作郵件。不過，公司Server入面嘅Email，理論上都屬於公司資產，按道理公司係有權隨時查閱，所以得閒記得清空紀錄。
第四招： 喺老闆視線範圍先好做嘢
老實講，如果你去到要扮工呢一步，本身應該多嘢做極有限，但無論如何，你都唔可以被老闆發現原來呢個職位係可以摺埋嘅。有D咩要做要Print，等老闆行出嚟先開始行動，永遠比老闆望到嗰陣都要忙到一頭煙，成個絕世好員工咁款。
第五招： 適時加班
老闆有云：「好嘅員工係唔怕蝕底嘅。」其要你最好日日OT之意實在太明顯。明明每日到五點九已經心急如焚，但如果唔係趕住走，何妨不定期自動波加班比老闆睇吓？其實唔難。約Friend食飯？與其喺街等班無時間觀念嘅人間渣滓，下次不如直接約八點半，喺公司坐到八點先起身，咁就充分表現出你愛公司之心。
你睇，坐坐吓就六點，好快就星期五，等多陣又出糧喇，有請小鳳姐！話雖如此，每間公司自由度都唔同，唔係每一項都適用，所以以上心法請大家融會貫通後，隨機應變。當然，以上只係假設你認為留喺呢間公司前途暗淡，又唔想太快轉工令CV難睇，被迫留低嘅過日晨大法。最好梗係花心機搵份有滿足感、可以全情投入嘅工啦。但，鬼唔知阿媽係女人咩。而且，玩還玩，交貨嗰陣始終要有真材實料，切勿跟車太貼，善哉善哉。