筆者真係好鍾意食嘢，繼上一次食咗窮人恩物——位於觀塘嘅一心素食，今次又難得放半日，咁就食豪啲啲，記得之前有人介紹過中菜軒，作為Hello Kitty迷既我當然要去朝聖啦！
餐廳名稱：Hello Kitty 中菜軒
地址：佐敦廣東道332—338號利來洋樓A至C地鋪 （佐敦地鐵站C2出口直行，沿著寶靈街直行，行到尾，見到利XX地產轉左即到，大約行五至十分鐘，比我想像中近好多，同埋好易搵。）
兩點幾左右到，（只可以話道門真係好實……初初以為鎖左門，點知係唔夠力開LOL ）餐牌一早已經放左係檯，啲嘢真係好貴……四十至六十幾蚊一個點心，我夠食五個九蚊餐啦，不過為左影Kitty，幾貴都要試一次架啦！
我同同伴叫左三個點心，分別係蝦腸、蝦餃同奶黃包。
其實真係同普通蝦腸無乜分別，都係一碟三條腸粉，唯一分別就係多左舊Kitty型既紅蘿蔔，啲蝦幾大隻，但都係偏少，一條腸粉得兩、三隻蝦，唔係好夠喉。：P
話口未完，蝦餃同奶黃包就黎啦。真係勁QQ！當然要相機食先～
 |
 |
老實講，相機食先真係好重要，因為味道真係好普通，唔係話特別好食，可能係我期望太高，但味道真係同我琴日係屋村酒樓食既差唔多。不過同伴話流沙包好好食，啲奶黃好香，平時佢唔係幾鍾意食，今日都食得好滋味。：P
不過認真，蝦餃就真係幾厚皮，但勝在幾足料，一粒入面都有兩、三隻蝦～
食完點心，當然唔少得影番夠本啦～燈呀牆呀公仔呀都好可愛～（心心眼）走之前飲多幾杯茶，除左係因為幾好飲之外，仲係因為師奶心態作崇，十二蚊茶錢點可以唔飲多幾杯，嘻嘻。
當我地比完錢打算走既時候，有位男職員問我地有無入房影（房入面有四幅Kitty畫），仲專登帶我地入去，服務態度極好～
總括而言，三個點心二百幾真心有啲貴，仲要加一，但黎朝聖都幾抵既，影下相、坐下、又吹下水，都係Kitty迷既好地方～不過短時間唔會再黎了，無錢啦唉：（
