我係一名孤獨精。經常好賴約朋友，覺得自己一個人出去好自由，亦都好鍾意自己一個既感覺。自己一個就係想點就點，毫無束縛。不過我都會好想同人分享一下我既經歷。
7月7日，麥當勞開始咗個叫"Create Your Taste"嘅campaign，客人可以自己係個mon到督督督揀配料，創造自己嘅Burger。
首先係揀包皮（編按：喂！），之後係幾多塊肉，再到揀簡芝士，接住就係要唔要酸瓜，蕃茄，生菜，再揀要咩醬，最後就係加啲咩配料，有菠蘿、蘑姑等等。
咁放工就去睇下啦，我覺得成件事好撚有趣。
店入面有好多督督機，幾部機隔離都有個著到空姐咁嘅藍衫M記姐姐為你介紹，仲會同你有傾有講，我問佢咩醬配咩醬好食佢竟然答我。我再環顧下四周，dllm，周圍都係藍衫姐姐，多到我一生都未見過咁多，去人地M記生日party個次都唔及依度三成。成件事好似去左動漫節，有好多Game girl走埋黎嚟，為你介紹新Game，叫你試玩咁。我諗你話要同佢合照都可能OK。
好，點完餐之後，你只需要搵個位坐低，放個唔知咩技術感應器（佢好似有講，但我已經唔記得咗）係枱面就得啦，自然會有人拎餐比你嘅。因為我畀撚咗75蚊，從未食過咁撚貴嘅M記。小弟平時多數都係食21蚊窮撚餐，就算帶個肯同你捱M記嘅女仔去都係60幾蚊搞掂。
個餐嚟到，望下個擺盤，係擺得幾靚嘅，有塊木板仔，D薯條用個格網裝住，個Burger睇落挺身D，唔會好似平時D包咁壓到扁蹋蹋，淋"bat bat"，味道都算唔錯。不過，其實食落都不太分到咩味打咩味，依家個after taste都係M記包囉……
間舖除咗藍衫姐姐之外，仲有好多面上帶點傲氣嘅黑衫人，應該係嚟自中央嘅Marketing同事。態度十分好，同你介紹曬個Burger同跟餐配搭，又問你意見，食完仲同你講拜拜，附送親切嘅笑容添。
依班黑衫人畀人感覺態度好好咁，但當然天下事情都係一撚樣啦：如果你係樣子娟好嘅女仔，係會同你傾得特別耐。我一路食緊我個相對貴到HIHI嘅Burger，一路聽到喺我後面條黑衫友十分詳盡咁同個女仔解說。由點餐，到個Burger，到飲品都介紹曬，飲品又有得試飲，之後又介紹埋甜品，好似就嚟要介紹埋家長佢識咁。
其實，又唔係話個個黑衫友都只係識為「客人」講解嘅，見到其中一個見個靚送完餐之後會同佢講聲：「繼續努力」。作為打工仔嘅我，覺得都算係咁啦，起碼佢appreciate你付出嘅努力，覺得你係有價值嘅先丫。
其實打工仔真係好希望office嘅人，或者係高層肯走落嚟凡間，睇吓個現實世界，唔係只係喺象牙塔度指指點點。有時我哋打工嘅，唔係話唔想做呀，只係有D嘢真係唔係好似老細所諗咁容易囉。所以，我都欣賞M記今次依個Campaign，起碼Office嘅人肯走落嚟，作為打工仔嘅我都有少少安慰，會心微笑。
望吓望吓，話咁快就食完，味道算OK。但成個過程，我覺得最有趣嘅唔係用督督機揀餐，唔係個同平時唔同咗樣嘅Burger，而係成間M記嘅意識形態。由無限多嘅藍衫姐姐，黑衫人對客人同「客人」嘅態度，以至食物嘅Present……係依間M記，我彷彿睇到現實嘅香港社會，係資本主義。
平時你去M記，佢賣個21蚊窮撚餐畀你，你要排吓隊先；點餐時，唔該跟規距講出食咩餐，加唔加大，飲咩，堂食定外賣，次序錯左請重答。然後，嘢食到就好似「劈」喺個「狗兜」度比你食咁……
宜家為咗喺你銀包度拎多啲錢，幾好態度呀！大量嘅藍衫姐姐，啲人又同你介紹，又送餐，又問意見咁，好鬼現實！畀錢仲可以揀畀八達通定Visa，慌死唔夠方便，令你畀唔到錢咁。
其實嗰位好識照顧「客人」嘅黑衫人亦都經常喺我哋身邊出現，係現實香港社會嘅縮影。如果你能夠為佢提供其他價值，佢當然願意為你提供更好嘅服務。而我依啲小獨獨得到嘅，梗係只係根據價錢所訂下嘅Standard Service啦。
不過，我地依D飲資本主義奶水大嘅，一早已經習慣咗，所有嘢都只不過係一場等價交換，反而對M記宜家依種親切友善嘅態度唔多習慣。
食飽走嘅時候，黑衫人同我講拜拜，跟單送上親切燦爛笑容一個。而我，只係點一點頭，對佢地今晚為我上演嘅依場Show表示感謝，然後徐徐離去。
現實嘅生活每日都係咁過，我哋希望依個社有更多溫暖，人同人之間更識得彼此關心。但去到依個烏托邦之前，我哋應該識得點樣為自己尋找快樂，咁樣先會有動力向前行。所以，我真心為左依餐M記而快樂，因為佢為我帶來有趣嘅體驗。