村民點諗，一向都係左右大局既～啟晴邨自來水有鉛，村民認為煲過D 水就無問題，呢個時候，就梗係要尊重村民啦～
首先村民一定係正確既，所以必須以煲水為前提來去除自來水中既鉛：）
科學家為左方便記錄及表達溫度，就將水在1個大氣壓力之下既沸點定為攝氏一百度（水既冰點就係攝氏零度），而所謂煲水，就係將水加熱至沸點。
係呢個溫度之下，絕大部份致病微生物都會死亡（除了瘋牛症的PRION，其實佢唔屬於微生物），故此自古以來人類都懂得將水加熱來防止喝水時感染疾病，及後連釀造業都懂得用加熱過然後攤凍既水用來釀酒釀醬油，避免不想出現的微生物影響釀造。
講左煲水咁耐，都係講微生物，而家村民唔係諗呢D 呀！然後呢？
煲水只係階段性既目標，要除鉛呢，大家就要問下自己，為左咁你肯付出幾多先？而家邊個唔付出邊個就係鬼丫嘛～
當水被加熱到達沸點，溫度就不能再上升，繼續加熱的效果，就是水吸收了能量後變為氣體，就是水氣喇～而大家見到煲水個陣一層白矇矇霧咁既「氣體」噴出來，係因為水氣遇到外面相對冷的空氣就會隨即凝結為很小的水點，令大家見到白矇矇的蒸氣。
咩話，一煲完就凝結咁便宜？！係架，其實呢樣咁便宜既事，全個地球每分每刻都做，大粒D 咪落雨囉～
唉，講遠左，而家村民要飲無鉛水呀～！
其實唔難架喔，只要取得煲水呢個階段性勝利之後，將水氣收集並凝結為純水，咁咪無曬D 鉛囉～～
上面都話，水氣遇冷就會凝結番做水，咁不如用以下既裝置送佢地一程啦～
只要用呢個裝置，在左面的容器煲水，水氣就會被逼經過中間稱為「冷凝管」的東東，呢個野就高科技喇，一邊入水一邊出水，水氣經過中間就會冷卻，凝結成為純水，再用右面的容器收集。
咁到左呢個時候，村民終於飲到煲走了鉛的水，功德無量～
（好熟面口？梗係啦，初中科學教過架～蒸餾水呀～～）