代糖夫人：
妳好﹗我係一個住係啟晴邨既師奶，你都知依家呢度啲水管有鉛啦。但我地住左係度好耐架喇，又唔搬得，一家人有大有細，點算好？
擔心的師奶 Grace
*** ***
Grace：
其實啲水有鉛，又有咩咁可怕喎？夫人明白大家飲啲有害物質，但啟晴邨甚至住係其他地方既香港人，都係度恐慌，夫人又實在睇唔過眼。係網上見到恐慌既人，唔少都係青壯年人士。飲下鉛水，係一個訓練排毒機能，同新陳代謝既方法。連少少鉛水都受唔到，將來點成大事？點解香港會變成咁架﹗
依家啲香港人，有咩事就屌個政府，以前我地呢一代，有咩唔係自己搞惦呀。啲水有鉛，咪自己去山上面攞水囉。香港人，本來應該係「捱得」既代名詞，今日卻同「反政府」、「搞政治」劃上等號。放低你地啲示威口號啦。少少食水問題就喊打喊殺，連少少鉛都包容唔到，激嬲「阿爺」，「阿爺」唔俾民主香港，唔放心俾香港自治，都係因為你地咁激架咋。陣間啲水管俾你地搞喊，成個畫面扣哂分，你地搞到成個民主運動衰哂呀。
拿，Grace，同你講現實。你驗得啟晴村，聽日後日大後日其他屋邨都會出事。你地有咁多民意，點解唔去爭取下釋放中國維權律師？兩樣野唔關事？咩唔關事呀﹗釋放左中國維權律師，咁中國既「維權」環境咪會好啲，咁樣對建設民主中國，就向前邁進左一大步﹗
中國民主左，咁香港咪有民主，咁啲水管問題，咪自自然然從根本改善囉﹗香港人視野要開闊啲、有深度啲，係度頭痛醫頭，腳痛醫腳，剩係係度換啲水管，無用架﹗個問題係體制呀﹗你問周保松、吳志森、黎則奮、古德明、謝志鋒、梁文道、屈穎妍、梁慕嫻之類社會賢達，都係咁答架。
點解唔對準體制，對準政權？建設左民主中國，咁中國人自然就會變成好鄰居，東江水都會變得好乾淨，到時大家就唔使係度爭論，究竟係香港啲水管有問題，定係根本係東江水有問題啦，亦都唔使賴個水喉匠啦，民主萬歲﹗N全其美呀。
飲開Pierre牌礦泉水既代糖夫人上