食水含鉛水平足以引致慢性中毒，市民應自行驗鉛

（photo via cc Flickr user aotaro）

睇呢幾日嘅新聞，令到我發哂火。點解？因為香港政府班高官一係就係低能，一係就通共賣港。好，就等我用寫科普文章嘅手法，去鬧爆班垃圾。

醫療系統高官不負責任：急性中毒vs.慢性中毒

首先，我要鬧醫療系統班高官，佢哋槍口一致話短時間飲用含鉛食水問題不大。呢個講法係不負責任。首先，中鉛毒係會入骨（因為人體會誤將鉛當成鈣，因此會入骨），亦會傷腎同神經系統，有部份損害係無法逆轉或痊癒，所以大部份國家會要求食水無鉛。

世衛文件提到，如果食水有210到390 ppb（parts-per-billion, 10⁻⁹）嘅鉛，就會令小童急性中鉛毒；而世衛就提議用10 ppb做臨時標準，因為呢個標準大部份國家能夠做到。至於美國，追求嘅標準係0 ppb，不過由於難度好高，所以就有一個action level：只要有10%水源有超過15 ppb，就要做嘢。

現時香港話發現有樣本超過世衛標準5倍，如果無誤解，就應該係講緊60 ppb，同令小童急性中鉛毒嘅水平，即係210 ppb，仲有距離。不過呢個水平，如果長期飲用，就有可能造成慢性中毒。

作個比喻，畀毒蛇咬嘅人，如果將蛇毒「分開一世」吸收，都會冇事。咁香港啲高官話短時間飲用含鉛食水問題不大，就要睇吓佢哋講嘅短時間有幾短，同埋超標幾多。無論點講，呢種講法係有啲誤導成份啦。

結論：雖然短時間飲用含鉛食水問題不大，不過長期飲用就造成慢性中毒。

市民應否自行驗水？

班高官叫人唔好自己驗水，Well，我嘅睇法就喺公眾同政府喺呢個問題嘅睇法係相反。理由就用下面個表做解釋

喺市民角度，如果自己驗，樣本無受污染而得出False-Positive結果，即係話食水含鉛無超標，而驗出超標。如果呢個情況出現，市民會恐慌，之後就會要驗血，當發覺驗血無事之後，先會驚完。不過對政府嚟講，公眾恐慌係好大鑊，而且要用好多錢去做檢查同維修，呢啲錢到底係政府包底，定係由建築商去哽，就現時大家都唔知。

對市民嚟講，最驚係False-Negative，咁就中咗鉛毒都唔知。正因為咁，市民應唔應該自行驗水？好似Hamlet嘅一句：To be or not to be? 梗係To be啦！

如果市民要自己驗，最簡單就係去Amazon訂啲tester（編按：或留意文末廣告 :) ）。價錢有平有貴，大概連郵費應該HK$300有找。方法好簡單，YouTube亦有片睇。不過要留意，通常啲tester只可以話你聽有無超標（用美國Action Standard 15 ppb，即係會比WHO標準低，如果用美國環境局批准嘅tester驗都超標，咁用香港嘅標準，就已經最少超標50%）。

結論：市民應該自行驗水，最多自己嚇自己，而唔會中毒都唔知。

政府驗水方法可能已經出錯，會導致False-Negative結果出現

從報導中理解，政府收水辦時嘅方法，可能已經出錯。據美國賓州州立大學（Penn State University）農業科技學院（College of Agriculture Sciences）網頁嘅指引，驗食水要收兩個水辦。第一個朝早第一次開水龍頭時就收集（first-flush sample），用嚟驗屋內水喉有無含鉛物積蓄。之後就放水一分鐘再取水辦，而呢個水辦（running sample）就係用嚟做對比，睇吓如果啲水有鉛嘅話，啲鉛係嚟自水源定係喉管。下面個表會幫你理解成個流程。

如果要查到底喺唔喺林師傅啲伙計用咗含鉛嘅物料封喉，就應該要一朝早就收兩個水辦。不過政府又唔係咁收水辦喎！

咁即係點？如果真係如報導話水務署開「衡」水喉5分鐘先收水辦，咁現時驗到嘅鉛，就一定唔係來自屋內喉管（因為要比時間啲鉛離子滲入啲食水，我上次篇文講咗，美國環保局話要6小時），所以啲鉛一係就來自源頭（邊度係源頭，就自行解讀），又或者係水箱同埋層樓嘅供水系統，真係諗起都驚！開「衡」水喉就等於掩蓋及沖走「屋內水喉嘅鉛」，等同做假證據。

結論：如果用個錯嘅方法去驗，係唔可能驗出啲鉛係唔係來自政府聲稱嘅接口位。即係代表（1）有可能有啲有問題嘅屋內喉管未被發現（即係False-Negative），而同時（2）有可能現時驗出嘅鉛係來自大廈供水系統又或者供水源頭。

（直入廣告：團購有特價，原價＄299，特價＄250，立即購買 http://bit.ly/1e0iz1G ）