（photo via cc Flickr user melanie_ko）
是咁的，因為覺得自己身體最近出現好多問題，所以開始跑下步操Fit下自己，點知就比我遇到一個幾靚女，對政治好熱心嘅屋邨妹，我哋真係有鉛份喇！唔知關唔關條邨嘅風水事呢？
跑步嘅地點，係我屋企附近嘅公園，去咗幾次，開始認得啲人，成日有個肥仔跑響我隔離，仲愈跑愈迫埋嚟，有次我啤一啤佢，佢仲好得戚咁同我講：「哈，你都嚟跑步呀？我以前好瘦㗎，但係突然間肥咗好多！」我無佢咁好氣，同佢講：「關我鬼事咩，無人識你呀。」點知佢發晒脾氣，大大聲咁講：「要不是我來跑步，這個公園早就完蛋了，你哪有跑步的機會？還不快點感謝我。」
之後個幾日，佢仲帶埋一家大細落嚟跑，男嘅細細個但就大大份，女嘅就一路跑一路喊，總之成家就霸住晒條路，我迫埋咗一邊，能夠向前跑嘅路愈嚟愈窄 ……我唔敢超前佢呀，佢右邊啲人，兇神惡殺實打死我；而左邊呢，初時以為係同路人，幫口出句聲都好丫，但好怕事嘅佢地當睇我唔到，仲細細聲咁同身邊個個講：「唔好搞事，我地都係原地跑算喇，郁咗啲啲都算做咗運動丫！唔係咩？」
我唔知可以做啲咩，唯有繼續低頭，跑得幾多得幾多。
皇天不負有心人，就嚮琴晚，我遇上佢。
微微嘅黃街燈下，大汗疊細汗嘅佢依然同前幾日一樣咁靚，係，我偷望咗佢幾日，每晚十點佢就會落嚟跑步，來來回回間，我每日同佢會有，唔多唔少，6次嘅眼神接觸。每次佢都好莫名奇秒咁望住我，好似有野想講又唔講咁，含羞答答，欲語還休。
我唔想日日都咁樣跑完、次次都對望完就走，咁樣落去無結果，同佢嘅關係都唔會有突破。於是呢一晚我嘗試加快步伐，追趕佢，嚮佢隔離一齊跑。 再一次眼神接觸後，佢同我微笑咗一下，我同佢點點頭，然後佢竟然撩我講野。
佢：「Hey，你係唔係呢幾日都有黎跑步？」
我：「係……係呀！」
佢：「Oh my god，唔怪得啦，你好似好熟口熟面咁，咦，定係我地以前見過？」
唔係掛，咁老套嘅借口，唔應該係由女神把口講出嚟架喎。
我：「都有可能架，住咗嚮呢條邨咁多年，見過都唔出奇。」
佢：「但呢度好多野都唔同晒lu。」
我：「例如街口間士多執咗粒？」
佢：「仲有雞脾好大隻，魚蛋好大粒個間小食店，個伯伯好好人，成日都送多粒畀我。」
我：「但妳唔覺得以前啲鋪頭噏噏耷耷 ，街市又污糟咩？」
佢：「依家都污糟架，只係另一種污糟啫。」
佢有啲概嘆同失望，我由憐生愛咁望住佢撥一撥把長髮。
佢：「好熱呀，真係搵次想勇敢啲剪短晒佢。」
我：「係呢？妳做咩㗎？」
佢：「空姐，岩岩考到入去咋。」
我：「哦……」
聽到佢做空姐，我心情沉咗一沉，因為佢一定唔會對我有興趣啦，然後佢果然問番我轉頭，想起我底。
佢：「咁你呢？你又做咩架？」
我：「喺間書店做咋，人工好少。」
佢：「好似好浪漫咁喎，日日對住啲書，唔怪得你斯斯文文咁啦。」
我諗佢應該講緊客套說話啫，咁我唯有都應酬番佢啦：「空姐咪仲浪漫，成日都有得去旅行。」
佢：「其實好辛苦，但我自細就好想做空姐，好想周圍去，唔想再屈喺呢個屋企。」
講到呢度，我地行到一張長凳前面，佢示意想坐低。
唔想再屈喺呢個屋企？祟外！比著其他人，一定咁樣話咗佢，但我都祟，好似陶傑咁講，係崇優。外國地大風景靚，一個住外國嘅朋友同我講，佢間兩層高，有大花園，千幾呎嘅House，計番港紙月供都不過五千，我響香港，拎住五千，最多租到間100呎嘅套房。唔係我想祟外，我係被迫祟外。
佢：「唔只係因為我屋企細，而係我嘅屋企人其實唔係同我好親。」
我：「點解嘅？」
佢：「你想聽咩？好悶架喎…….」
我：「想，妳講啦！」
佢：「因為我由細到大嘅「爸爸媽媽」其實係我姑媽姑丈，係佢地湊大我，另外仲有兩個「細佬妹」。」
我：「咁你親生父母呢？」
佢：「好早就唔離咗婚，唔要我嚕……所以我有時會覺得呢個屋企唔屬 於我自己，我好想快啲衝出去，有一個自己嘅家。」
我地兩個沉默咗一陣，只係望住前面嘅花草樹木，四周圍都好靜好靜。我已經好耐無咁樣靜落黎諗下野，傾下計。一畢業我就一直做一直做，我覺得自己唔會有得休息。我會做到死個刻，但最後我可以換到啲咩？我唔敢諗。
佢：「我以為我好憎呢度，對呢度無晒感情，但原來唔係。前排我屋企有事，姑媽有病，我同公司請咗大假，日日都留喺屋企，我先發現，原來我對呢度好有感情，始終我嚮呢度大。」
我：「咁妳姑媽依家情況好啲嘛？」
佢：「初時以為好咗，但最近又驗到其他地方有事。」
我：「Sorry……」
佢：「我無野喎，我開始麻目，我只係一個空姐仔，邊似得『細佬』同『細妹』，一個讀law，一個讀醫，有乜野，都係佢地話晒事。」
成個mood好sad，再咁落去唔得。
我：「講下啲開心野丫，細個個時住呢條邨覺得好Free好好玩，周圍都係識嘅人，我一放學番屋企放低書包，嚮條冷巷跑嚟跑去，我阿媽就去隔離打牌。」
佢：「我以前都係呀，成日都同Best friend落樓下傾天光。」
我：「但好多朋友都已經搬走左，依家新搬入嚟嘅全部都唔識，唔好話文化，連語言都唔岩channel，依家隔離屋住咗咩人我唔知……睇住自己熟悉嘅野遂啲遂啲變得陌生嘅感覺真係好可怕。」
佢：「喂！你又話講啲開心啲嘅野，無喇喇自己嚮度Sad！」
噢，機會來了！
我：「咁呀，講下你男朋友吖，你地拍咗好耐拖架喇？」
佢：「邊個話你知我有男朋友？」
我：「唔會無掛。」
佢有啲怕羞，擰咗去第二邊，我當然無好戲劇性咁拖住佢話：「咁等我做啦」，傻嘅，我有自知之明，從來我都無諗過要搵一個條件好好嘅女朋友，只係想搵個簡簡單單嘅女仔，過啲安穩嘅生活，不過「安穩」呢一個詞語實在離我太遠。以前話男人三十而立，但我依家先知，三十原來唔係講年紀，而係有至少三十萬首期。
其實我呢個廢青能夠同佢傾咗咁耐，已經好滿足，再勉強落去都無幸福……正當我起身早點歸去免得泥足深陷嘅時候，佢都一齊起身，喺我耳邊問我：「走喇？唔繼續跑架？」
聽到佢咁講，我又控制唔到心底嘅慾望，答佢：「跑呀，跑！我仲有力可以跑。」
佢笑咗一笑，之後望住不遠處，唔知幾時開始有一大班大媽Set緊音響，班大媽嘅音量已經連呢個公園唯一寧靜嘅環境都破壞埋，但我依然聽到屋邨妹好清楚咁講：「咁繼續一齊跑啦，不過……一齊去第二度跑啦！」
莎比亞 書展新書《鬼叫我唔識拍拖》
Page內有出書詳情，查閱請在FB search「莎比亞」。