呢個世界，有99.9%嘅人都唔想返工，但又想有錢；剩返嘅0.1%，唔係唔想返工，而係佢哋根本唔使返工都會有錢。
好多仆街就會睇準呢啲種「想我都想好似中咗頭奬」嘅心態，用啲包裝得好好嘅計劃出嚟呃呢99.9%嘅人啲錢。
───
第一個畸士，發生喺我友人T嘅朋友身上，叫阿橋。
阿橋三十幾歲，喺大公司做一個普通文員，做咗接近八年，人工兩萬多啲，未婚兼單身。阿橋係一個孝順仔嚟，同退咗休嘅父母同住，每個月都會畀啲家用佢哋。
一個男人，唔使供樓畀租，一個月有萬零蚊用，生活算可以。當然，佢返工係搭公共交通工具，三十幾歲人嚟講，真係好可憐。
阿橋唔玩HiFi唔煙唔酒唔好玩具唔買衫唔打機，亦唔玩女人（每個月得個萬零蚊，畀女人玩就得）。佢唯一嘅「不良嗜好」，就係佢嘅興趣係創作、搞藝術，總之做啲純粹自high、圍爐取暖，但完全搵唔到錢嘅文青類活動，好似以前嘅科網股咁淨係燒錢。所以打咗工咁多年，阿橋嘅積蓄一直徘徊喺汕頭以南、汕尾以南……呀係喺五位數字左右。
喺大公司工作，工作佔咗佢生活120%時間，所以阿橋一直無機會專心去搞佢啲文青活動。都好，搞呢啲文青活動，輕則家破，重則人亡；萬一你唔覺意溝咗個文青女，輕則精盡，重則人亡，同樣死路一條。
某日，阿橋唔知痴咗邊條線，突然想辭工唔做，專心去搞佢啲文青嘢。呢啲係咪所謂嘅mid-age crisis?但阿橋仲係好後生。無論如何，最終一定係土地供應，同佔領運動嘅問題。
作為孝順仔嘅阿橋，雖然想辭工，但唔想斷咗畀父母嘅家用。你知唔孟子所講嘅「不孝有三，無後為大」，其他兩種不孝係乜？唔係無seed呀仆街。第一種係見到父母有錯而唔勸佢哋，陷佢哋於不義（即係你住黃埔見老竇老母投票畀梁美芬呢啲仆街，而你由得佢哋），第二種，就係父母年老無錢過活，你唔去做嘢。
咁點算好呢？
作為一個三十幾歲嘅男人，有問題，梗係去網上論壇啲投資台，請教啲師兄嘅睇法。而家網上論壇加google，已經可以幫你解決大部份人生嘅問題，剩返落嚟嗰啲，例如689幾時死、香港幾時有真普選，無人會畀到答案。提起問題同答案，我想講到而家都仲有班弱能覺得Celine啲相無問題，純粹係有班人造謠生事。梗係啦！啲相無問題，有問題嘅係你哋呀嘛。跟啟晴邨班人去醫院驗下腦先啦。
睇下睇下、問下問下，阿橋覺得投資概念、投資工具呀，好有趣，好想去學下投資，於是畀咗港幣三萬發千發百發十發元，報咗一個名叫「如何在三十五歲前致富退休」嘅課程。
課程唔係由各大大專院校舉辦，亦唔係財金演員主講，而係一啲佢話佢自己好成功嘅仁兄，俗稱悉尼老鼠去講。Ok，可能我孤陋寡聞。之不過，你想發達要先畀$38,888，有些少「欲練神功，必先自宮」嘅味道。Ok!講到底，始終你係去學嘢上堂，學金融、投資概念喎！Discounted Cash Flow喎！CAPM喎！Put喎！Call喎！一個唔覺意學埋Black-Scholes Formula，（以為）學識埋炒窩輪，真係抵呀！學阿張家輝話齋：以前無，可能將來有。學晒真係破產可期、破產可期呀，仆街！
講到底，咁其實阿橋去上堂嘅問題係乜呢？
呢個課程明明叫「如何在三十五歲前致富退休」，但阿橋已經三十六歲，咁點成功呀你老母？哈哈哈哈哈哈哈，都未開始上堂，你就已經註定失敗咗咧！！！真係未曾酒醉已清醒，未曾深愛已無情呀～～好可憐呀！
好啦，我哋唔好年齡歧視。錢都畀咗，咁阿橋咪去上堂囉。上堂學乜，完全唔重要，一來小五以後書本上嘅嘢，喺現實生活多數無用－100萬題目：屌你你話我聽中學學嘅action force = re-action force喺扑嘢過程有乜用。我再大力，對方都冇反應。咁啲action force去咗邊？係咪人類都有個build-in嘅黑洞？諗真啲又好似真係有……
二來，個課程唔係為咗教識你嘢。重要嘅並唔係導師教你乜，而係呢個課程一定，係一定會有一個單元，要你根據自己嘅背景情況、財政狀況、人生目標，做一個投劃計劃出嚟喺堂上present。美其名係做功課、學習演示技巧，實質係想摸你個底蘊。
好啦。咁阿橋咪照做功課，話自己有呢啲文青嗜好，想辭份工但又想老竇老母有生活費囉。
導師聽晒之後，會單獨約見每個學員，再畀意見佢哋。好啦，咁阿橋嘅導師就提出以下意見：
「由於你係屬於低風險投資者，我唔建議你買股票或者房地產。
可以考慮買啲回報6-8%嘅債券。兩百萬嚟講，乜都唔使做，每年大概有$14萬回報，相當每個月萬鬆啲蚊。
你既可以畀生活費父母，自己喺財政上仍有相當嘅自由度、又唔使返工，可以做你中意做嘅嘢。
有隻叫中聯香港嘅債券，2017年5月到期，回報6.5%，你可以考慮下。」
上面每一句，句句毒藥，字字引導，全部引誘緊阿橋。佢最正呢，係佢唔會第一句就講適合你嘅建議，而係講你唔適合啲乜，令你覺得導師真係有為你個畸士諗過度過；再加埋「乜都唔使做」、「自由」、「唔使返工」呢啲三十幾歲廢青聽到雙眼會發光嘅字眼，真係好難唔中招。
阿橋又未迷得晒。佢將以上嘅嘢講咗畀我朋友T知，T再嚟問我意見。
我搵到真係有中聯香港呢間公司、佢真係有隻債券後年到期做緊6.5% yield. 我循例同T講，話買債券，公司有機會唔還錢，到時乜都冇，求其敷衍咗佢。
我敷衍佢，唔係因為我唔知道買債卷、同埋聽佢導師講有乜嘢風險。而係，我知道，
一個人去上呢啲堂，喺某程度上已經財迷心竅，好撚想發達、好撚想乜都唔做有錢，所以你講乜嘢說話去阻止佢都唔會有用：好啲嘅，你好心勸佢，佢聽完唔出聲唔理你照去馬；差啲嘅，你勸佢，佢用返10000億個理由去反駁你唔理你照去馬；再仆街啲，你勸佢，佢屌柒你再唔理你照去馬，跟手覺得你阻住佢、嫉妒佢有機會發達，大家連朋友都冇得做。
佢腦海淨係得返錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢錢。你做乜講乜都係多鳩餘，佢始終都會去馬。慳返啖氣好過。喺股票行，呢啲例子日日都有、每分鐘都遇到。
課程嘅導師，就係睇準呢一點，所以會個別約見學員畀投資意見，再搵機會呃鳩你啲錢。
所以我同朋友T講：「為保存你哋之間嘅友誼，你係咁咦講下好。你講乜，佢都唔會理你。」
「明啦。」阿T喺gchat回我。
幾分鐘後。
T喺gchat大叫「呢鑊仆街咧！！！！！！！！」
「？？」
「阿橋上兩個星期嚟問我意見，我頭先正想同佢複述你嘅嘢，點知佢話，佢啱啱已經買咗兩百萬嗰隻中橋香港！！」
「哦，咁如果佢真係買咗隻債券，唔係畀咗佢導師幫佢投資，無乜所謂。而家求神希望間公司唔好走數囉……」其實呢個計劃最大風險，係導師同阿橋講去買債，但臨尾就同阿橋講：
『阿橋，我諗諗下，你買6.5%嘅債，回報並唔係太理想。因為年底美國加息，到時息口上，你債券嘅價格會跌，會對你造成損失。
咁啱我有朋友有個投資計劃，一年預計回報有13-15%，係買債嘅一倍。即係你乜都唔使做，每年大概有$28萬回報，相當每個月兩萬鬆啲蚊，多成倍。到時你你既可以畀生活費父母，自己喺財政上有仲大相當嘅自由度、又唔使返工，可以做你中意做嘅嘢。有冇興趣？』
所謂導師拋個債券計劃出嚟，只係想引蛇出洞，睇下你有冇、同有幾多資金。到你肯投資，佢就會諗方法整個陷阱，呃撚晒你啲錢。
係˙呃˙晒˙你˙啲˙錢˙
你嘅、你老公嘅、你父母嘅、你親戚嘅，全部呃撚晒。
所以，聽到阿橋話買咗債券，咁都安落啲。呢個導師似乎算有良心，淨係呃咗佢嗰$38,888學費。
突然，我覺得有啲嘢唔係好妥。
史兄：「之不過……咦……咁阿橋買債券個兩百萬，喺邊度嚟？」
T：「阿橋叫佢父母按咗層樓，借咗兩百萬畀佢去買債券。」
哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈
我已經喺公司笑撚到斷氣：
「哎呀……仆你個臭街，佢為咗畀生活費佢老母，叫佢老母按咗層樓去買債券，呢個咪係喜劇之王條橋嚟？哈哈哈哈哈哈哈……」
───
『做舞女？你唔係話要養我嫁咩？』
『你唔做舞女，我邊有錢？
我無錢，又點養你？』
古有「割肉還母，削骨還父」，今有「買債還父、按樓養母」，仲要按老母層樓。
三千大千投資世界，無奇不有。