（photo via cc Flickr user mararie）
感謝人靚歌甜嘅 the pancakes 幾個月前咁有心機去留意到我哋偉大同永恆嘅梁幹部特首每次面對香港人社會、民生、經濟、政治、娛樂、便秘、無地方做愛‧回家等問題時都會賴地硬。呀、唔係，係土地供應不足至啱。細細個常識書就有教香港地少人多，所以尐高樓大廈起到「香港，可能係世界上最好跳樓嘅地方」嚟滿足住宅需求。然後我哋再移山填海，無樓無到情願畀打一世牛工都搵唔到嘅錢都要爭住去住係堆填區上面。
長年累月下，不知不覺間我哋接受土地問題係事實。特首、司長、局長、議員都用哩個名題嚟鳩spin卸膊，幾位經濟學家都借故話要我要真掠地開發郊野公園、提高土地供應（其實已經無左新界東北‥‥）。墳總亦係新書《香港的命運》中提及土地供應乃香港面對緊既難題之一1。係數字上睇，係，香港的而且確係地少人多，逼到成每平方公里上有成二萬幾人，以全球城市計排第五，尐對手唔係印度就孟加拉。
不過，樓，香港唔係無，只係你同我打工仔買得起。係香港人都知道上樓係無得講句「其實唔難」（等陣，我當左大劉仔唔係人。Sorry。我誤判。我內疚）。屋細都唔係問題，真心舒服就得，但無良發水、白痴設計屈尺數仲屈成幾百萬就真係DKLM。再加上幾萬個後生仔女去輪幾百個公屋，咁就大問題。香港住宅問題歸根究底唔係供應問題，不過各位放心，小弟唔係嚟鞭地產霸權屍。
其實政府係救緊自己，因為成個市場關系到特區政府嘅統治。唔係想抄墳總，我只不過係好認同佢所提到嘅正當性2 。當年港英政府正正靠住高效率行政管理達到經濟奇積嚟催眠港人，深知我哋非常嚮往「正常生活」3。特區政府都係食緊哩條水，鬼叫無普選咩。換言之，如果經濟唔好，政府上下全體仝人網購定KY都得了。所以，就算無得暴力救市，至至至緊要守住個庫房，得閒派吓糖，呃吓我哋去睇金魚。
我唔係齋吹，政府唔放地起樓、就算不停賣地都畀誠哥四叔都真係政治上同行政上自救。因為成過半庫房收入來自私人物業嘅相關活動！2013—2014財政年度政府收入達4553億，當中有六成就係靠地同樓，仲好玩個大富翁。物業稅，25億；土地基金，104億；差餉，149億；地租、土地牌照加政府物業租金，208億；印花稅，415億；地價收益，843億；來自業主立案法團嘅利得稅，1161億。亮點係，樓價升，庫房收益升，因為上述所有款項都按市價計！
好奇的你會問：「咁公屋都有租收喎，有得賺政府都唔起多啲賺？」少年你太年輕了。2013—2014財政年度房委會收收埋埋啲公屋租都仲要係管理公屋一項上有成億赤字。 一塊地值幾百億，仲要之後長賺長有，攞嚟同你起公屋？傻的嗎。當權者就永遠會顧住自己，政府就永遠會顧住自保，除非香港人識還拖，否則填海、炸山、舊區重建抹殺農田出嚟嘅新樓唔見得我哋住得起，公屋食水唔見得會無毒過油站汽油，而好多嘢有好多嘢拆咗就無，整都整唔返。我只想十年、廿年、三十年後都有新鮮無添加新界菜食，落到街間老字號冰室仲沖到杯絲襪奶茶，創世紀入面個陳錦鴻終於可以抖吓，一街唔係普通話（下刪一千字）。
唉，聽日七點鐘又要起身返工‥‥
- 《香港的命運》 – 青永屍，p.37-9
- 《香港的命運》 – 青永屍, p.23-5
- Hong Kong: Colonial Legacy, Transformation, and Challenge – Chan Ming Kou, p.14 “While lacking popular legitimacy based on electoral mandate, accountability, and representativeness, the colonial regime aimed at administrative legality and functional efficiency. The colonial polity had been characterized as consensus decision making with “administration absorption of politics" that laid the foundation for social stability and economic growth.”