近期個個都中晒Juno毒，好似斷背山咁個個都有道羅生門。我公司同事阿強有日趁我去去吓廁所，佢就突然喺我後面陰聲細氣咁同我講：「其實…我都有道羅生門…」
「咩料啊大佬，你有門關我春事咩…不過你即管講黎聽，話唔定我將你故事寫成小說，他朝一日仲拍埋電影添。」
「好啊好啊！我個經歷拍戲一定好睇過林詠琛！」
「拍戲嗰個叫葉念琛啊！」
於是，阿強就喺公司男廁將佢嘅羅生門娓娓道來，件事發生喺好多好多年前…嗰年佢中五，有同學約晒咗全班喺畢業前去深水灣燒野食。
到當日，全班同學每人拎住幾十袋炭同野食浩浩蕩蕩咁黎到燒烤場，同班mk仔已經熱到除晒衫秀出佢地美味可口嘅排骨，其中一個mk仔紋咗條荊棘喺手臂惹來一陣女同學騷動。不過半個鐘之後，佢地每個人都臉如死灰，因為無一個人識得起火，呢個時候就係阿強出動喇！
阿強將幾個一展莫籌嘅mk仔推開，然後開始將用將炭精擺底層三角位置，再以金字塔方式將炭堆疊好，唔洗一粒鐘，阿強就自己一個人起咗十三個爐。火燒得又猛又旺，大家就開始叉腸叉丸叉雞翼。
「好西利啊！點解嘅？」其中一個女同學阿Yan好自然咁坐喺佢隔離。
「妳真係想知？其實呢個係三角燃燒理論，要個火燒得旺，氧氣、熱量、燃料缺一不可，頭先不停燒報紙雖然個火係好猛，但燒一陣就熄，係因為唔夠氧氣…」阿強好榮幸可以將參加童軍時所學背返晒出黎。眼見阿Yan用一副仰慕眼神望住自己，就算夠強起爐起到成面炭都值回票價。
「哎呀！」突然，阿Yan唔小心將條腸仔跌咗落阿強隻腳度…
雖然可能真係唔小心，但對於阿強黎講，簡直係無限嘅性暗示！
「唔好意思啊！有冇整親你？」阿Yan著住白色T-Shirt，條頸搭住一條用黎裝飾嘅毛巾，但點都遮掩唔到裡面套粉紅色泳衣。無錯，阿Yan一陣會去游水，照咁嘅情況睇，仲好可能會同阿強一齊游水添。
「不如我幫妳燒吖，妳想食乜？」
「我想食雞翼，但次次都燶晒，一係就唔熟…」
「好啊，我好叻燒雞翼！」
阿強唔係認叻，佢真係好叻燒雞翼，只要有耐性同毅力，燒一隻外脆內軟又唔會生勾勾嘅雞翼，其實唔難。
結果，阿強不停燒，就燒咗一個燒烤拼盤畀阿Yan食。而呢個時候，一班阿強嘅死敵mk仔從遠處走埋黎。
「喂阿Yan，做乜咁悶坐喺個肥炭人隔離啊？唔臭咩？」
「車，阿強不知幾好啊，佢燒雞翼畀我食，似得你地咩，今日阿強淨係燒晒畀我食㗎喳！」
「我哋呢邊買咗啤酒喎。」
「走開啦，唔飲啊，又食煙好臭啊你！」
「我係都唔走開，吹咩。」
「阿強唔洗理佢，你繼續燒畀我食吖。」
阿強高興地點一點頭。開始幫佢手上隻雞翼搽蜜糖，不過佢留意到，身後班mk仔隻眼都同阿Yan搽緊蜜糖，即係點？即係視線由隻腳掃到上個頭，再由個頭掃返落隻腳，搽完正面仲要搽背面添。
不過阿強無出聲，因為佢淆底，所以佢只好專心燒靚手上隻雞翼，留住阿Yan芳心，等到燒完野食，阿Yan就會開口提出「喂～不如一齊游水吖～」只要恆久忍耐，阿強就係人生大贏家！
「喂～不如一齊游水吖～」聲音從背後響起，而家係男人。
阿強回頭，係品學兼優，運動萬能，仲係二世祖嘅Raymond。佢著住一條滑浪褲，一身熱汗，臉上面嘅笑容同個陽光相當配襯。
「好啊！」阿Yan諗都唔諗就丟低隻碟，就撓住Raymond隻手頭也不回步向沙灘…
一片寂靜無奈，現場剩返阿強、食緊煙嘅mk仔，同埋一堆燒得好靚嘅雞翼。
一群失敗者！
「喂…你啲雞翼…都無人食㗎啦，不如畀我哋食啦～」其中一個mk仔指住碟燒烤拼盤。
「食食食！食你老味啊！」阿強一怒之下拎起碟雞翼同豬扒，黎手扔落炭爐度…
阿強低頭望一望自己成身炭，全身大汗，成手都因為叉雞翼同豬扒而油淋淋。到底全日咁辛苦為乜？
件事就係咁…
「點睇？」阿強問我。
「喂大佬你同個阿Yan點止隔住道羅生門啊，直頭相隔成個平行宇宙喎。」
不過…阿強係我嘅朋友，佢只係一條溝唔到女嘅可憐蟲，所以我將佢嘅悲慘故事寫出黎。
最新出版：《就算愛很苦》