【廣告辛談‬】抽水、借趣、揭書，沒有誰比誰高尚

呢一兩日，品牌連環抽錯火水事件，令「抽水」再次成為全城焦點。

幸福嘅抽水其實唔差，佢叫跌倒嘅人最緊要識企返起身，呢句大道理其實對任何人都work。若果佢冇用阿茂張原裝相，同埋cut 走「無論真痛定假痛都work」呢句直接腰潤阿茂嘅說話，可能都可以逃過被刪po嘅命運。（當然，幸福本業係醫藥，同醫生呢行利益轇轕太大，唔抽其實先係上策。）

美麗華個抽水post 反而有少少無謂，純為爭取眼球，同本身個品牌形象（其實有冇？）完全冇協同效應，抽嚟唔知為乜！樂視呢，紅色資本係佢嘅原罪，佢哋成日抽水，擺出黃絲姿態，講到尾都係宣傳策略，為咗洗甩本身朕大陸味。

有啲出身4As名門正宗嘅廣告人，好鄙視「抽水」行為，覺得做廣告，應該係掉返轉做啲野出嚟畀人抽水，唔應該變成每日上網搵料，有咩hit 就抽咩水。

有呢個諗法嘅人，通常都預設咗抽水行為係為抽而抽，純粹呃like，忘記咗抽水只係一種手法，本身並無對與錯；抽水創作本身蘊含嘅信息，其實係可以同品牌一向宣傳嘅理念一致，甚至將佢發揚光大。做唔做得到、抽唔抽得好，當然係睇創意人嘅功力。

有啲brand本身形象玩開嘢嘅（好似M＆M’s、Jolly Shandy等），抽水可以話完全冇違和感，夾brand image當然可以一抽再抽；有啲brand本身可能冇乜形象可言，若果冇包袱，抽水極速增加知名度，本小利大，都可以試下。若果個brand 本身行開嘅形象比較老正，抽水有機破壞形象，得失方丈，就梗係無謂抽啦。

其實唔抽水，廣告人都成日用借趣手法 （borrow interest），即係利用一啲現成已成功建立嘅趣味創作廣告。好似 DDED 咁，佢雖然成日抽政治水，當幫客戶做廣告嗰陣，佢都會收斂返啲，轉而多用借趣手法。佢最近為 EGL Tours 東瀛遊 製作嘅短片，就借咗孖寶兄弟嘅趣，玩咗好多經典遊戲元素，例如地下水管、城堡打大佬等。呢條借趣片，同TVC信息一致，都係透過傻豬豬報錯團嘅橋段，反襯出揀啱旅行社嘅重要性。

唔止抽水同借趣，其實好多廣告人創作，都係參考日本廣告書／Design書，上Creativity、Ads of the world、digital buzz blog、adverblog、 広告日和、 唔係賣廣告 等平台搵reference，同樣建基於現成嘢去創作。

都係借鑑別人，真係冇話誰比誰高尚咯。

作者：辛達