（photo via cc Flickr user bobbi vie）
早幾日，香城發生左一件震驚全城既大冤案。一名四十幾歲的男人，被控偷睇國家機密，法院裁定罪名成立，處以極刑。點解我地會咁肯定係冤案？因為事實上我地知道，尼名被控偷睇國家機密既男人，係一個自小已經雙目失明既視障人士，係不需要經過換位思考去證實的。
尼件案件既裁決一傳開，立即成為網上熱話。雖然有一部分人會懷疑，「會唔會國家機密係用凸字記錄架？如果係咁既，都有機會架？係，可能偷睇個「睇」字係唔係咁準確，但偷摸國家機密都係犯法架，既然法院咁判就一定有佢既道理既，個男人無錯點會被判刑？」會咁諗野既人，恭喜你，你已經踏入左八奇思維既第一步，我篇文唔係比你睇架，麻煩按一下LIKE，之後上一頁出返去，科科。
「盲既偷睇國家機密？有無搞撚錯？」
正常人係聽到尼一單案件既時間，都不約而同講粗口，並發出相關疑問。大家都對尼個咁荒謬既裁決表示忿怒。一時之間，網民化身天文台表示該日係香城最黑暗既一日啦；化身人力資源顧問表示黑警亂拉人屈一個盲人會影響晉升（係會晉升得快左），但同時係死全家既；亦有網民化身死因庭宣佈法治已死，死因係土地問題，同埋個裁判官仆街。基於信仰關係，裁判官雖然仆街，但明_社表示佢唔一定會落地獄，但網民認為要先將佢送去上帝身邊。
ANYWAY啦，一日之間，香城就集中視線係尼單新聞上面。
但大家都知道，淨係係網上面鬧下，係唔足夠既，如果鬧兩句件事就解決到，老燒就唔會成日估錯野做明燈啦（頭盔：蕭生好野﹗蕭生好野﹗）。所以，係事情討論得如火如荼既時候，有一個多年來戴黑超戴到人地以為佢真係盲左既謝老四（非猁），上載左一張戴住黑超既自拍照，加左個TAG 「 ＃盲人X偷睇」，呼籲香城一人一相，表現關注及支持。由於謝老四薄有名氣，而香城人又對自拍有情意結，所以很多人立即支持，大家都高抄低抄側面黑白LOMO加FILTER露事業線畫插圖幫公仔帶黑超，各出奇謀。平民藝人皆樂此不疲，香城對事件的關注已經到達高峰。
高？高處未算高。盲人組織協會認為，法院裁定盲人偷睇國家機密，係荒謬，係歧視，係唔能夠接受既。所以佢地發起左一場遊行，高呼「盲人不能偷看」，行動重點在於「一人一黑超，不分盲唔盲；一戴一露目，還盲佬公道」。遊行當日，一班反對法院決定既人，無論你盲定係睇到野，都帶住黑超出黎遊行。可能因為大家都唔係好習慣帶黑超，覺得好新鮮好好玩，所以遊行過程充滿歡笑，大家都樂於尼一種和諧美好既示威。遊行隊伍上見到很多熟悉的面孔，長毛毛啦，邵膠樽啦，呀，聽講膠樽兄佢諗左好多新奇有趣既口號，唔知用唔用得著呢？一班社運人士出來嘻嘻哈哈聚舊，好似同學會開PARTY一樣，和平理性非暴力非粗口嗎？大家做到啦，比D掌聲自己。
太美好啦。
不如我地將畫面轉去個名男子身上。
佢係經過被拘捕、提堂、監禁、虐待（聽講），之後送上刑埸。已經被折磨得不似人型的他，在未說完最後的遺言「係人都知道我盲架嗎，你地居然屈一個盲人，話佢偷睇國家機密咁過…..」就被一鎗打死了。
由於尼幾日係香城最黑暗既幾日，加上大家都戴住黑超，所以大家都睇唔到對方有幾咁好笑，好撚好笑，笑到我想喊。
你地仆街啦。