是咁的，尋日（8月8號星期六）打開信箱，見到HKTV Mall 派過黎嘅宣傳單張，話只要WhatsApp一個指定電話，寫出自己嘅名，再加埋地址同埋想要嘅禮物（如梅酒、巨峰提子、橙汁），HKTV Mall就會係一個鐘之內，將禮品免費送到你屋企。
咁好啦，承傳香港老一輩唔執輸嘅心態，我就即刻WhatsApp HKTV Mall，而佢亦都承諾會係一個鐘之內送貨。
等撚左四個鐘！！！！！！
WhatsApp確認訊息係下午3點23分發出，理論上佢應該4點半前點都送到貨黎。而我本身亦都計劃好5點鐘出街。結果呢？一直無人上黎送貨……
4點半過左，5點黎緊。出唔出街好？算數，既然王維基今次好似咁有心搞，一於就睇下佢幾點鐘送到。
頂，一等就等左4個鐘！不過唔好咁開心住，夜晚7點半，HKTV Mall唔係送貨上黎，而係用另一個電話號碼WhatsApp你，話俾你知「因為反應熱烈，所以可以去金楓閣拎禮品」。
遲大到，仲好意思叫人落樓拎禮物？
明明講好左一個鐘送到貨，結果一直無消息，隔左4個鐘，先收到訊息。王維基仲好意思叫人換衫落街，行5分鐘過去拎禮物？
行5分鐘係好閒，我亦都無真金白銀俾到錢，不過呢次經驗，絕對令我對HKTV Mall留下一個非常壞嘅印象。
王生，你而家搞嘅唔係實體超級市場，係網上嘅超市呀。點解啲人要網上購物？就係懶、貪方便囉！話明懶，當然希望賣方可以將貨品直接送到屋企，而自己就可以足不出戶都收到件產品。
既然你而家推銷緊網上購物，咁仲點會叫人落樓，去換領你嘅禮物？你今次做嘅宣傳，都係想話俾大家聽，網上購物真係好撚方便啫。咁而家叫人落樓，咪同你當初嘅宣傳目標背道而馳？
俾少少交帶好唔好？
HKTV Mall解釋，未能依照承諾，一個鐘內送貨，係因為反應太熱烈，WhatsApp號碼俾WhatsApp封鎖左，我係相信，但不接受呢個講法。
講好左一個鐘，因為突發事件而遲到，或者大家都唔想，但你係咪應該通知我一聲，唔駛我係屋企白白等你四粒鐘？溝女我都未試過等條女四粒鐘啦！
再講，既然你搞得網上生意，咁因為反應熱烈而搞到WhatsApp死機嘅問題，你應該一早知道會有呢啲潛在問題存在，並諗定有無後備方案，而唔係等出左事至慌失失，搞到大失方寸。
而家啲「老而不」最鍾意話年青人無責任感、唔交帶，並且無周密嘅計劃，如果呢種講法係成立，咁王維基絕對係一條廢青。
網上業務，親民不是一切
最後，有人就讚王維基親自派蜜瓜，非常親民。之但係你問我想要親民嘅一剎那，定係能夠依照承諾、準時送貨嘅服務呢？
我一定會揀準時送貨，網上嘅野就係要快而準。你又遲到，又要人落樓咁唔方便，下次我仲點樣有信心去幫襯你？
後記
王維舉創辦港視，我絕對支持，但今次嘅宣傳活動，真係令我非常失望。希望王維基可以好似香港其他廢青一樣，好好反省一下，然後跟我們偉大嘅上一代學習學習。