近來重新迷上衛斯理系列，幾乎每逢週未都會去中央圖書館借新還舊。今日去到中央剛好見到地下展覽廳舉行「抗日戰爭勝利七十周年大型展覽」，當然老虎蟹都入去望下有無開羅宣言劇照。
因為之後有其他事，展覽我只是草草行了一轉，未有閒暇逐一細看展品，正想準備下星期再慢慢行多轉，卻發現原來展期只是由8月25日至31日……所以大家有幸看到本文的話，應該已經無機會再去參觀……
從結論來說，本展覽繼續是中共的一種宣傳，是中共對抗日史的一種利用，紀念先烈可以說是做到，但對戰爭的反思、所提出的展望，都仍然流於表面，甚至只是「打下飛機」的程度。以下是一點隨筆。
1) 成個展約分成4部份，分別為 (1) 中國抗日史 (2) 香港抗日史 (3) 日本投降 (4) 未來展望（當然展覽方面作的標題靚好）。其實由中、港抗日史，到日本投降的論述，問題都不大。而香港抗日篇都有提及加拿大軍來港抗戰等歷史，算比較全面。
2) 展品不算多，但有代表性的海報、相片、報導等，都有展出，可以給參觀者一個抗戰時期的基本概念（當然，只是基本）。
3) 因為好基本，所以我並非想討論這幾部份的史料。而這些香港抗戰到重光的基本資料，相信日來大家從facebook和一些報章上也可以讀到，在此不提。我主要想說的是展覽中關於所謂的未來展望。
4) 首先，一入到去睇到個前言，已經唔多開胃……「中國軍民歷經十四年慘烈戰鬥與巨大犧牲，終於贏得抗日戰爭的最後勝利，徹底粉碎了日本侵略者殖民奴役中國的圖謀，迫使日本在戰後歸還侵佔中國東北、台灣和澎湖列島等神聖領土」……所謂「粉碎xx的圖謀」、「神聖領土」等字眼，真係好中共，同埋好北韓，好propaganda feel呀，可唔可以執執佢先出？（當然唔會，因為真係propaganda黎）
之後個小節更是無言：「中國人民抗日戰爭的偉大勝利，重新確立中國的世界大國地位 (well…)，捍衛了國家主權和領土完整（後來內戰拆了個台灣出來，仲講咩主權同完整？），洗刷了百年來民族的恥辱，正氣伸張，氣壯山河（抗日勝利可以連八國聯軍等等嘅恥辱都一次過洗埋，勁！咁點解香港之後仲係屬於英國呢？），是中華民族彪炳史冊的歷史大事（係中共宣傳的大事才對吧）」。
然後再下面是一大段習總講話，一般野啦都係，唔引係習總就更好。
5) 之後直接跳到 (4) 未來展望篇。呢一段開始又係好野：「中國人民抗日戰爭，從一開始就具有粉碎野蠻侵略、拯救人類文明、保衛世界和平的重大意義。」
好勁，差在未講埋維護宇宙和平。至於是否「一開始就具有」，不必研究，一定係。
之後一節都係講下中國人民點強勁消耗日方力量、協助盟軍云云，戰後又點樣得到尊敬和尊嚴、捍衛世界秩序等，詳細各位自行閱讀（相機鏡頭有少少水漬，但不影響閱讀）。各位唔使聯想二戰後韓戰、越戰等時期中國嘅角色架喇，都係維護世界和平，堅定不移抵抗帝國主義入侵，一定係。總之後面個句就係「沒有中國，你們都打不贏日本仔」。
6) 之後的標題是「珍愛和平，開創未來」，這部份更人嘆為觀止。詳細內容太長，也不逐一引述了，各位可以由下圖細讀。我只想指出幾點： 一、四字詞一堆堆，又懶煽情，真係唔知邊個寫。 二、繼續係引習總、李某之言，似乎近年的國家領導的見解異常地獨到，值得一再放於本展覽上警剔後世。 三、提埋「中國夢」都算，抗日講到「一帶一路」、「亞投行」呢啲概念股會唔會遠左些少？
然後文章提及中國軍力預算不高，比起美國只是四分之一；又說東海南海多事，需要提升國防實力；更說日本修改安保法等是復辟軍國主義，為禍人間云云。跟手隔離係咩呢？自己睇：
7) 無錯，一旁的圖片正展示中國最新型的戰機、航空母艦、軍艦，以及如何捍衛南沙群島、釣魚台等地主權的資料。首先所謂軍艦當然令我聯想起艙門被撞開的「中華神盾」鄭州號。航空母艦遼寧號？都好似死過火喎。而戰機張相我唔係見到核戰機或者Z高達已經好安慰。
當然，向自國國民展示一下自國軍備和實力，幾乎每一國都會做，但應該唔係呢個情況下掛。你明明講緊「珍愛和平」架喎，點解唔放下維和部隊啲相或者相關任務，而不斷提南沙群島同釣魚台？強國強軍保衛的和平，就只係自己的神聖國土？而人家解禁集體自衛權卻是密謀對外擴張? 到底哪方才是不斷提升軍備（和維穩費）預算、意識形態上復辟軍國主義、強奪爭議領土的國家？大家可以不妨多看新聞，比併一下各國軍備預算與實際行動，再作思考。
8) 最後兩段，繼續抄書。首先再次rectify中國在南沙的發展，之後又引一大後習某之言（老實講好1999……）、搞好上海合作組織和金磚五國的合作、「一帶一路」、「亞投行」……等等又不停無限輪迴，搞到我以為自己中左火影個招「伊邪那美」。簡單來說中國就是要堅定不移保障自己可以掘起和維持發展利益，並加強同其他國家合作；至於「合作雙贏，開創未來」？我天朝做乜都好就係唔鬼理你日本仔，你自己慢慢同美國搞TPP啦哈哈哈哈。（係，成段野都無講過要同日本合作）
之後一段提及抗戰相關的紀念日，又繼續loop堅定不移、捍衛和平、國家主權……一堆詞語炒埋一碟，完。
9) 抗戰抗日，說是認識歷史，但到最後果然都是要洗大家腦，吹下自己國家點威點勁，日本人就點都一定有不軌圖謀，毫無悔意；我地好多Friend肯同我地合作丫，唔需要理日本喇。
如果這些就是中共所謂的新型合作、維護和平、振興中華的「中國夢」，這國家的將來堪憂。
至於展覽其他部份有沒有暗貶英國、故意淡化英軍抗日史等，未能詳細拍照及分析，希望有人可以幫忙補完。
最後想講，臨走個陣有個外藉人士入黎參觀，我先發現原來成個展係無英文解說。不過入面啲紀錄片又係播外國嘅，講英文的，真係好難理解。