「到底邊個發明返工呢樣嘢㗎呢？」香港人成日都會問呢個難解過恐龍滅絕原因嘅問題。
老實講，香港打工仔嘅怨氣，可能真係世界第一，點解？返九放六係基本，有啲仲隨時OT到八、九、十點，冇補水㗎，仲要唔OT就比人歧視咁款，放工想食餐好啲，貴夾難食，返屋企抖下？一諗到租間豆膶咁細嘅房都$5000-6000，你就會覺得而家出嗰啲4K電視根本就嘲笑緊你。當返工嘅怨氣無從發洩，只會越谷越大鑊，到爆嗰刻，可能係劈砲唔做，又或者已經好似丁蟹一家喺天台頂時。
好嘞，今日唔係講呢個土問供應問題引伸出嘅問題，因為呢個問題除咗一男子／一籃子因素，延伸落去仲有例如地產霸權對升斗市民剝削探討、李氏力場引發打工仔心臟病分析、CCTVB未能舒發師奶以外族群情緒研究同地鐵到底可加可減但唔知減咗去邊而顛覆數理邏輯嘅後遺症等等核心問題討論，真係講到2046都講唔完。而其實返工本身比你嘅壓力已經足夠令你痴線時，呢啲外在因素根本不值一提。而有時返工最仆街嘅係，未必係你嗰個離咗地嘅老闆，而係嗰啲以為自己做得耐就惡嘅老屎忽，有權就大撚晒嘅上司，同埋你對佢無可奈何嘅「打工仔」同事。特別好似我呢啲「屎摩浦提圖」，最多時間對住就係呢個佔好大比例嘅「打工仔」族群，分佈喺你前後左右。
偉大嘅電影哲學家周星馳有句對白講過：「七孔流血還七孔流血，死還死，兩樣嘢嚟嘅，唔好撈埋一齊講呀吓！」呢句說話充滿住哲理，點解呢？只要你明白個關係，你就會發覺佢突破咗好多盲點，當中包刮以下呢句至理明言：返工還返工，做嘢還做嘢，兩件事嚟嘅，唔好撈埋一齊講呀吓。
打工仔十個有九個都係希望返工唔駛做又有糧出，返工等放工，放工等出糧，出糧等退休嘅「三等公民」，加埋一到夏天就會望天打掛－－望住天文台等掛八號風球或者黑雨，唔駛到冬天已經係周圍搵地方匿去蛇王，大致上打工仔就這樣鍊成了。
「搵食啫，咁執著做乜。」好多朋友都咁同我講，誠然同公司講感情係一件戇鳩至極嘅事，我承認，因為工作本身就唔應該講感情。但我老豆教落做人要對公平啲，唔好講到食君之祿要擔君之周⋯⋯係擔君之憂咁偉大，但起碼受人錢財替人消災，返工點都要做下嘢掛，當係一種平衡心理又好，喺公司搵存在感又好，滿足自己嗰手指尾咁細嘅丁點責任感都好，平平實實，我相信係好多打工仔嘅心聲。但偏偏，你總會發現你身邊有啲唔撚係做嘢嘅人，而更甚係會阻住你做嘢，令你原本想輕輕鬆鬆鄧子峰返去睇下CCTVB嘅膠劇都唔得嘅。而更吹漲係，你老細以為佢都做得嘢丫，冇咩問題呀，所以你想做小人打小報告嘅機會同阿源係一樣：係零。
當你望見嗰啲同事，退後一步諗，就會好似我咁，終於得道，參透乜嘢叫「返工還返工，做嘢還做嘢，兩件事嚟嘅，唔好撈埋一齊講」，只要你完完全全感受到呢個真理，你會好似遊歷完地獄再有升天嘅感覺，你豁然開朗了。
返工同做嘢，真係兩回事嚟。經常有朋友同我講，我哋要學嘅唔係做嘢，而係返工。即係點？有冇見過有啲人返工好似成日都好忙，但係生產力奇低，甚至冇？有冇奇怪過有啲人點解可以錯同一個問題錯十九幾次都錯而你知道佢唔係蠢唔係冇能力？老實講，遇到呢啲人我真係嘔血，最正嘅係，你同佢講，係你厚多士，你同上級講，會被人話你攪屎棍，攪人事，攪階級鬥爭。結果有問題嘅係你，因為你提出問題，就係你唔和諧，唔合群，同人相處有問題，分裂公司，影響同事士氣等等，要解決就解決你先，因為解決咗提出問題嘅人，問題就唔存在啦！
我聽過有人講，話佢有個同事每日返工就係send e-mail比自己，然後自己回自己e-mail，不斷重覆又重覆。我問佢，嗰位同事係咪有精神病，佢話：「佢精撚過你呀。」諗深一層，又係嘅，只要佢係學緊語言，其實係一個好好嘅練習嚟，例如日文咁，集練文法、造句、學生字同應用於一身，用工作時間嚟學習，但啲人又以為你好忙，比唔到嘢你做之餘仲可以增長知識，嘩，幾咁絕呀。又有啲人做嘢，真係叫做咗嘢就算，結果係點？話之你。「我做咗啦，你唔滿意之嘛。」大佬呀，我問你攞e-mail list你走去print比疊嘢幾十版比我做乜鳩呢？嗰一刻我真係唔知好嬲定好笑囉。仲有一類人係乜都唔關佢事嘅，「呢啲嘢唔係我做㗎喎，老細都冇叫過我做。」舉個例咁，細公司，冇乜人嗰陣個個都要聽電話㗎啦，偏偏就係唔聽，響到爛都唔聽，你問佢，佢咪咁同你講囉：「聽電話係阿邊個聽開㗎喎，我唔做呢啲嘢㗎，唔通公司冇人要我掃埋地洗埋廁所呀？」嗰一刻，佢好似好有道理，但點解明明大家都係staff，我又要聽電話換水自己抹枱換廁紙呢？我望住嗰泡黃過啤酒嘅尿，我睇唔透。
咁你遇到呢啲人，點解決呢？答案係冇。你一係解決自己，劈炮，一係呢，避之則吉。但劈炮呢家嘢，講就凶狠，做就通常碌撚，見過唔少拍枱拍櫈鬧鬧鬧嘅人入到老細房死狗（其實我都係），老細嘅氣牆根本就係AT，輸咗個勢，好似輸比使徒咁啫，其實係好正常嘅。如何型棍地劈炮，只要明白東家唔打打西家，其實選擇嚟，了解自己有幾多本錢，就知自己值幾多錢同喺咩位置。而我最憎就係啲成日鬧公司同現況嘅人，但從來唔會去諗點改變現狀，日日好似怨婦咁但又賴死唔走，同嗰啲執笠清貨講十九幾年最後今天第二日都繼續叫賣嘅真係冇乜分別。
遺憾地，我做咗三十幾年人，都係只識做嘢而唔識返工。其實工聯會有冇班教人返工㗎？我想進修下入政府做呀，又或者入民建聯都好丫，人工高又福利好，出入仲有慈母護航，嘢又唔駛點做嘅⋯⋯