香港地，窮食，有咩揀？
食茶餐廳？貴到PK喎。
自己煮嘢食？冇精神喎。
食杯麵？好多味精喎。
其實仲有一樣食物係又方便又平嘅，就係：蝦子麵啦！
話說舊年參加咗「唔幫襯地產商的聖誕」義工行動（而家已經唔係聖誕限定嚕，每個月都會擺下檔，請多多支持），我負責聯絡蝦記麵廠，推介本地製蝦子麵。因為我成日要幫手搬麵，搬得麵又會貼相呃下like，間中廢噏幾句食後感，搞搞下好多朋友以為我係蝦子麵狂熱份子，見麵就tag我…其實我好想重申：我唔係特別熱愛蝦子麵㗎咋，我食即食麵大㗎～～～由細到大都見老豆食壽桃牌，一直都唔明啲冇味又唔彈牙嘅麵點解要存在——我以為蝦子麵係by default難食。直至到我試過真•蝦子麵，又同其他食過真•蝦子麵嘅朋友交流，我先知道：原來煮蝦子麵係可以唔使落任何湯料包或調味粉㗎～～～真係開心大發現！♥
除咗因為真•蝦子麵夠真材實料，大多數都不經油炸、不含防腐劑，夠晒健康外，好多朋友俾我啲推麵post吸引係因為「香港製造」。或者係因為知道香港近年過份倚賴中國貨，對本土產業發展唔係咁健康，而且中國嘅會爆炸又會食壞人，所以大家聽到有香港本土嘢時，會更加珍惜，想好好捍衛同傳承。
頭先講過，我係因為做義工而認識蝦記，自此一直幫襯。不過蝦記位於土瓜灣，沙中線未起好（編按：唔好問我地幾時起好，請問港鐵），港鐵去唔到，對好多人嚟講都唔太就腳。徇眾要求，我搵咗上次做曲奇blind tasting嘅講故佬，一齊挖咗一堆香港麵廠出嚟，抽咗其中七至八間嘅蝦子麵搵朋友試食，邀請佢哋以湯頭，口感同味道作評分，然後我哋根據價格調整得出一個總分。有啲本地蝦子麵例如好到底、張榮記、有記等等，坊間已經好多介紹同食評，今次我哋就唔再搵人試喇，大家可以善用Google大神同全能嘅Facebook。我哋揀嚟試嘅麵廠其實好random，純粹希望港、九、新界都有啲，方便唔同地區嘅人，就係咁簡單。
拿，先旨聲明，其實每間麵廠都有好多種等級嘅蝦子麵，冇蛋啦有蛋啦唔同份量嘅瑤柱甚至更貴嘅食材都有。我哋係揀每間最平嗰隻蝦子麵嚟試，因爲我哋覺得最平嘅蝦子麵，先可以試出麵廠嘅真功夫（同埋平～～～）。煮法方面，我哋每一個麵餅會落1.5碗水，兩個麵餅就落三碗水，煮一分半鐘。真•蝦子麵都經過大地魚湯熬製先再烘乾，個麵餅本身就吸收晒大地魚地精華，所以唔需要再落其他嘢，個湯本身亦都會有味。
試食團有：
嘴叼專業組：Kilo，小熊貓繪梨，真珍（小熊貓繪梨個Friend）
廢青組：quenthai，Charles Low，擇言（好似係粵典嘅創辦人），慶生， 察理，Wilson（汭文老公）
美女組：爾雅，汭文，Alision（粵典高層），Can姐（粵典御用插畫家及UI Designer），木星文，Natalie（Charles Low個老婆）
方丈組：Jeromy（膠事錄Admin），倫爺
神（齋食唔評分）：散彈一號
懶得俾分連食都好似冇食淨係掛住玩個場嘅PS3真係唔合作組：容樂其
好，睇睇試食結果先～
Can姐好多插圖～
1. 嘉禾粉麵廠
（$62/斤，每斤約10個，平均每個麵餅$6.2，建議滾水落麵）
地址：大埔懷義街7號地下
電話：2656 9369 / 2658 6578
營業時間：07:00 – 19:00
平均評分：湯頭：2.39；口感：2.93；味道：2.68；總分：2.75
總分：3
大埔嘉禾有超過75年歷史，但係舖面唔古舊之餘，仲係我去過嘅麵廠中少數有冷氣嘅，大熱天時入去買麵個人都買得爽啲。去買麵嘅時候差唔多見晒見到老闆一家大細，特別感受到家族生意嗰種承傳精神。嘉禾門市喺大埔，廠房就喺粉嶺，賣嘅嘢包羅萬有，除咗廣東麵之外，仲有蕎麥麵銀針粉檬粉雲吞皮燒賣皮腐竹饅頭壽包花卷乜都有…想喺屋企煮乜都得～
試食團評價：
擇言：個湯好清甜，樣樣嘢都掂
Natalie：湯頭淡，冇乜蝦子味，麵質彈牙
察理：湯偏淡，嚼口普通，有淡香，彈牙
汭文：淡，但麵有較多蝦子，幾彈牙，唔香
Jeromy：好膠
木星文：鹼水味重
Alision：味略淡，帶鹼水味，不夠鮮味
quenthai：湯偏腥而味淡，麵質不夠爽口
Can：
2. 新廣利粉麵廠
（$44/斤，每斤10-11個，平均每個麵餅$4.19，凍水或滾水落麵都冇所謂）
地址：土瓜灣九龍城道38號鴻英大廈地下B舖
電話：2818 6161
營業時間：04:00 – 18:45
平均評分：湯頭：2.17；口感：2.50；味道：2.30；總分：2.43
總分：2.5
搵呢間麵廠其實都有少少波折。話說本身搵到廣利麵廠個地址係西環厚和街，但又見有網上資料話佢早兩三年已經執咗，唔死心照打電話過去問，阿姐即刻話佢哋已經唔喺厚和街，而係連埋廠房搬去咗土瓜灣寶馬車街對面，而家叫做「新廣利」。不過去到土瓜灣見到佢哋架貨van仔車身又冇改地址，真係有啲confusing，總之大家記住要買麵就過嚟土瓜灣啦～
搬到過嚟土瓜灣，喺兩檔豬肉檔中間延續「舊廣利」嗰80幾年歷史嘅新廣利，唔知喺過幾年港鐵沙中線開通後——亦即係地價勢必狂升之時，仲留唔留得低呢…？
試食團評價：
Jeromy：感覺不錯，但不蝦子
Kilo：水味極重，微蝦子味；口感？有的嗎？
Wilson：蝦子不見了，吃完想哭了。
汭文：湯有陣麵粉味，唔香，少蝦子
小熊貓繪梨：咸口，但冇蝦子味，少少彈牙
Alision：沒蝦子味，但作爲（非蝦子）麵一個湯和麵的味道不錯
木星文：湯甜，好腍
爾雅：冇味嘅！！？？
Can：
3. 陳明記粉麵廠
（$50/斤，每斤10-11個，平均每個麵餅$4.76，建議水就嚟滾時落麵）
地址：九龍城啟德道77號
電話：2382 1121
營業時間：24小時（！！！）
平均評分：湯頭：3.34；口感：3.25；味道：3.31；總分：3.34
總分：4
九龍城陳明記就巴閉喇，最深刻嘅係當我打電話去問佢哋收舖時間時，佢哋話係開24小時！上網查一查資料，發覺原來陳明記就開喺朋友好鍾意食嘅黃明記粥粉麵家對面，而且據聞黃明記嘅麵係陳明記供應嘅。（兩個都叫「X明記」感覺好有愛～）有70幾年歷史嘅陳明記係前舖後廠，減省咗運輸時間，啲麵會相對新鮮。另外我見舖頭寫住「禮盒裝必須提早預訂；禮盒另加$3」，大家可以留意返，食過鍾意嘅買禮盒裝送俾朋友都幾好呀～（利申：未見過個盒，唔知靚唔靚）
試食團評價：
Kilo：口感較佳，味道冇蝦子味，湯色較正常
Wilson：湯頭的香味濃郁，麵條彈性略嫌不足
察理：湯頭略淡
汭文：湯幾香，夠咸，湯色澤較深
擇言：嗯… 分唔到…
小熊貓繪梨：口感OK，尚算彈牙，蝦子味不太突出
Natalie：湯頭有蝦子味，但略嫌鹼水味比較重，麵質普通
Can：
4. 壽桃牌
（$14.4/斤 — 以454g一包$10.9計算，每包10個，平均每個麵餅$1.44）
各大超市有售
平均評分：湯頭：2.34；口感：2.63；味道：2.31；總分：2.44
總分：2
Chevalierusa – http://is.gd/frxJno; CC BY-ND 2.0
唔…唔使介紹啦？呢隻純粹拎嚟做control架咋～唔…同埋…話就話佢係「香港卓越品牌」啦，但我睇返個包裝袋，咪又係寫住「契丹製造」，真係好似某航空公司…
試食團評價：
汭文：只係一個生麵，唔似係蝦子麵
擇言：淡得濟
小熊貓繪梨：鹼水味重，冇蝦子味，麵身偏淋，聞落都有鹼水味
Alision：重鹼水，麵淋，無鮮味；你已經死了 
（我討厭鹼水）
真珍：麵較彈牙
Wilson：說好的蝦子呢？
Kilo：太軟，冇味
木星文：蛋味重
倫爺：普通
Can：
5. 雙喜粉麵廠
（$42/斤，每斤8-10個，平均每個麵餅$4.67，建議滾水落麵）
地址：北角春秧街91號泰興樓地下
電話：2806 3756
營業時間：07:00 – 19:00
平均評分：湯頭：3.34；口感：3.94；味道：3.38；總分：3.53
總分：4
有近50年歷史嘅北角雙喜都係前舖後廠，啲麵全部喺自己廠製造。由於北角有「小上海」、「小福建」之稱，立足北角嘅雙喜都賣好多上海同福建嘅傳統麵食，啱晒呢區嘅老街坊。春秧街除咗雙喜之外仲有一間振華製麵廠，我哋今次隨機揀咗雙喜嚟試，但據知振南都係啲開咗60年嘅老字號，大家嚟到春秧街不妨兩間廠都試下丫，又或者兩間各有自己嘅鎮店之寶呢～
間麵鋪對出就係電車佬，附近都係啲菜鋪肉鋪，人車電車爭路，非常老香港
試食團評價：
汭文：好食！湯好飲，麵有蛋香
擇言：口感好得，層次分明
小熊貓繪梨：麵質爽口彈牙，湯頭味濃，蝦子味道夠
Alision：個麵好大但係個麵好碎
Natalie：湯頭有味，但非蝦子味，麵質超彈牙
quenthai：湯偏腥，麵質極佳
Charles：湯咸香，麵質一般
察理：爽脆入味
木星文：麵爽但冇味，湯甜
Can：
6. 人民超市
（$98/斤）
網站：http://www.25686811.com/
平均評分：湯頭：3.81；口感：4.09；味道：3.84；總分：4.06
總分：4
人民超市呢隻招牌手打蝦子麵有蕭生推介…（蕭生好嘢！多謝蕭生！）因為今次試食大會原意係試香港老字號麵廠嘅蝦子麵，所以本身冇揀到人民超市。咁啱試食當日有朋友帶咗上嚟同大家分享，就一於煮埋啦～想買可以上佢個網度買，好似有得送貨。
試食團評價：
汭文：更好食！要添食。湯夠香濃，麵質彈牙
木星文：夠蝦子味，湯鮮甜，麵夠爽口入味
小熊貓繪梨：聞落有蝦子香，更爽口彈牙，味道夠濃，有少少aftertaste；少少偏硬新，但口感很好
倫爺：麵身較硬
Alision：湯甜，尚算鮮味，麵有咬口；唔知爭緊啲咩（攤手不負責任 ¯\_(ツ)_/¯）
Natalie：湯頭有好香蝦子[味]，麵質彈牙
真珍：蝦子味較濃
quenthai：麵質極佳
Can：
7. 佛記粉麵廠
（$58/斤，每斤11-12個，平均每個麵餅$5.04，建議滾水落麵）
地址：筲箕灣望隆街3號合隆工廠大廈地下
電話：2567 1212
營業時間：08:00 – 19:00
網站：http://www.fatkeenoodle.com/
平均評分：湯頭：3.63；口感：3.43；味道：3.13；總分：3.57
總分：3.5
佛記由1924年創業至今有成91年歷史，而家呢個老闆已經係第三代接班人，講故佬聽講個老細有MBA（好似係，應該冇睇錯）！佛記唔係前舖後廠，但個廠都係喺筲箕灣，另外西灣河、西營盤、大埔墟、佐敦都有門市。有次經過佛記買麵，見到佢哋有隻「齋蝦子麵」，原來呢款係冇落蝦子，而係用紫菜（好似係，應該冇聽錯）去模仿蝦子麵嘅味道，素食朋友可以一試呢～
睇佢哋網站，佢哋話會「冒著斷掌之險，徒手取下麵糰，測試軟韌程度」。我想講，唔洗咁博㗎…
好多媒體報道
試食團評價：
爾雅：個樣好有蝦子
Kilo：冇乜味，湯尚可
真珍：麵味過淡
Charles：湯夠咸
汭文：湯好味過個麵。麵有陣味
Wilson：湯頭不錯。吃完有一股神祕的味道。（講故佬：果然係兩公婆…）
Alision：湯鮮但重鹼水，但湯和麵配合，感覺不錯；另賣相不錯，多蝦子粒
木星文：湯味濃
Can：我條脷開始冇感覺啦sorly
8. 東記粉麵廠
（$40/斤，每斤11-12個，平均每個麵餅$4.35，建議滾水落麵）
地址：油麻地新填地街50A
電話：2780 4100
營業時間：06:00 – 19:00
平均評分：湯頭：3.34；口感：3.00；味道：3.00；總分：3.28
總分：3.5
東記都係油麻地街市開咗近40年，啲麵同樣係每日喺香港廠房新鮮製造。除咗各種粉麵之外，東記仲有好多點心材料例如春卷皮、威化紙、蓮蓉、麻蓉、奶黃等等，嚟買麵之餘都可以買啲材料返屋企自製點心呀～ 講故佬嗰日去到間鋪嗰陣，見到老闆用英文同南亞裔嘅送貨仔鬧交，佢呆咗…
試食團評價：
小熊貓繪梨：湯頭有鹼水和味精感，麵較淋身，咸得來有啲假
Natalie：湯頭清甜，麵質尚可
Charles：淡而夠味
真珍：麵較軟
Can：麵幼咗所以冇咁好咬口
擇言：喂，Control嚟㗎？冇味嘅？
Wilson：鬆散不好吃。
汭文：麵質有啲削
Alision：有鮮味亦有鹼水味，無咩咬口（似似地天使麵@@）
睇完六（加二）間麵廠，可以得出以下結論：
- 各位試食員都唔係味盲，壽桃牌唔意外地全場劣評
- 可能價錢真係同味道成正比，最高分竟然係人民超市
- 唔知點解好多麵煮出嚟都有啲鹼水味
- 湯嘅濃淡度同麵嘅口感真係各有所好，大家不妨試曬所有蝦子麵再睇吓邊隻最啱你～
根據以上結果，係時候睇吓邊間嘅蝦子麵最好食：
- 最佳湯頭：筲箕灣佛記
- 最佳口感：北角雙喜
- 最佳味道：北角雙喜
- 最平：土瓜灣新廣利
- 最抵食：北角雙喜
所有試食數據可以呢度睇返
喺度順便開心share吓啲買麵貼士先：
- 呢啲麵廠都係香港老字號，做開街坊生意，多數用個膠袋執幾個麵就俾你拎住走。如果想買嚟送禮，可以問返佢哋有冇禮盒買——有啲麵廠係你加錢買佢就俾你，但平時唔會主動sell禮盒。
- 麵廠標價大多寫每斤價錢，但其實都係按重量計，唔一定要買足一斤，可以直接同佢講要幾多個麵餅，就算只係買三四個返去試食先都得。
- 老字號廠房有個特色，就係其實好多都冇set死營業時間，就算打去問，佢哋好多時都只會答個大概時間。不過因為麵廠都係凌晨三四點就開始造麵，朝早六七點就開舖，傍晚六七點就收舖，如果諗住放工去買，最好打過電話睇下佢閂未先，免得摸門釘。
- 聽過一個講法，話蝦子麵係應該放落室溫凍水先至開火，咁個過程中就有足夠時間俾啲大地魚湯精華滲返出嚟；煮到水滾就攪散個麵，軟硬度適中就食得。當然，最好你去邊度買麵就問返嗰間廠嘅人佢隻麵點煮最好。我相信麵廠自己係最熟知自己嘅麵嘅特性，佢話凍水落咪凍水落（例如蝦記同張榮記都係咁教），佢話滾水先落咪滾水先落囉（例如上面介紹嗰啲麵廠噉）。
- 其實香港好多麵廠㗎，下面個Google Map有齊香港咁多間麵廠嘅資料，大家不妨周圍買吓試吓啊～
今次只係介紹到呢啲麵廠，爲咗確保啲試食員唔會飽死，香港其他十幾間麵廠未能盡試，希望大家明白其實我哋唔係只highlight個別麵廠嚟sell，而係想話俾大家知，其實要食本地製嘅靚麵都有唔少選擇。日後如果經開同類嘅老麵廠，不妨買幾個麵返屋企試下，一嚟比較新鮮、天然、健康，二嚟大家多多支持本地廠房，呢啲傳統行業先唔會咁快式微呀！