（photo via cc Flickr user Mario Antonio Pena Zapatería）
「你知唔知點解男女嗌交總係女人羸？」
如果你連呢條問題都要問既話，我諗你應該要由頭開始學男女關係喇。
因為呢條問題係：無得解。
大部分女人，係一般情況下都唔會十分之理性（我話大部分呀下）因為女人係水造既所以特別感性（其實人類根本有7成都係水份啦妖）；更甚既如果係男朋友面前係更加唔會理性。你要用一個理性既問題去分析一個唔理性既行為，甚至係唔理性既人，邊有可能？
所以女人咪會羸囉。理智既男人們，請唔好同女朋友們嗌交呀。
扯開少少話題，如果男人同男人嗌交，有咩傾唔掂咪打過囉，最簡單架啦。打完咪又係攬頭攬頸friend過打band。有女人會話佢地傻，但我覺得呢啲叫做爽快。咁打完咪算囉，唔好放係心，唔使煩。幾好？
又如果女人同女人嗌交，嘩不知幾煩，初之眼超超繼而出口術，或者批下你踭咁，而果啲單單打打既說話要幾難聽有幾難聽，分分鐘難聽過粗口。有時我真係寧願佢地講粗口，好過單打，失禮人又失禮埋自己。女人同女人嗌交通常只有兩種下場，如果本身唔friend既，咪兩邊都R爛塊面，以後永不相見；二，本身都friend底既，通常都會friend番囉。但可能都會搵個機會提番件事，得閒又抽下水咁。記唔記係心？視乎有幾friend啦哈哈～
但其實女人同女人嗌交最終極既係「面和心不和」，對住你笑笑口，背住你係度唱你，又或者望住你FB p左既相同隔離個friend笑9你，嘩呢種變臉既國粹真係女人終極武器呀。
咁男人同女人呢？分層面既。男朋友vs女朋友，就一定男朋友要識得輸。如果你唔想輸，嚴重既話，咁你可能會輸左個女朋友，跟住你就會對住你另一個女朋友－你隻手。所以咪當讓下佢囉，女人有咩問題向另一半提出既時候，其實好多時都唔係要個男人幫佢分析，佢地只係想呻下，係唔想聽分析架。要聽分析佢地自己會搵另一啲朋友傾，而唔係搵男朋友。男朋友係要黎安慰佢，或者借個膊頭比佢既。
如果你硬係要同佢講道理，咁你地就好快會嗌交。女人道火係好容易畀名為「男朋友」既生物激發既，簡直係牽一髮動全身，（唔計上述情況既話，）有好多時候其實男人們係唔知自己做錯啲咩或者講錯啲咩。又有可能只係佢咁岩period，唔係幾舒服，所以就搞着你。咁呢個時候都係快啲認輸啦，認輸實無死既，我話既。除非你女朋友係被虐狂，鐘意大男人，鍾意嗌交，或者鍾意畀人鬧啦～～咁又唔同講法（掛）。
仲有一層，請你永遠不要挑戰～～～
就係阿仔vs娘親。娘親口中既「講一句駁十句」我就由細聽到大，雖然我唔係仔，但每一次我都覺得同娘親嗌交其實最終輸既都係自己。如果你想係屋企既生活安安定定既話，我勸你唔好同娘親嗌交，因為呀仔係唔會羸老母，佢只會用一堆你聽唔明既說話黎教訓你，或者加兩句粗口，佢嬲起上黎大可以係你番工／出街既時候掉走晒你心愛既figure，你由細儲到大既game書，又或者係你一直收收埋埋既H漫……你想知道你娘親既破壞力有幾大的話，即管挑戰啦～～（唔好話我無警告你呀～～）
（其實有一個level係同女上司嗌交，但我諗無人會咁做，根本同自殺無分別！所以直接skip左佢算喇。）
不過呢，情侶間小吵架其實有益身心既，有啲情侶真係愈吵愈開心，感情會更好～所以小吵可能怡情，大吵就免啦，視乎閣下既相處模式同女友既性格啦；至於偉大的母親呢，咪做下孝順仔囉，可免則免，咁辛苦養大你，你估你細個激得佢少咩？（ 娘親tone）