（編按：未成年讀者唔好照住個網址打）
「Hey，Brenda，不如今晚一齊落LKF飲嘢？」同事Mike問。
「唔好喇我都唔飲酒嘅，你同其他同事去啦。」Brenda微笑地說。
「飲少少啫唔驚喎，哥哥睇住你。」Mike說，再加個林峰style chok樣。
「Er…我…」Brenda尷尬地說。
「Mike！啲單你入晒喇咩？好得閒呀你而家！響度聊妹妹仔！」老闆Michael突然從暗角出現並說。
「係係，我而家即刻入！」Mike說，並心知不妙，9秒9地走回自己的坐位。
同事之間朝夕相對，一起吃飯一起加班，而且同聲同氣，可以一起鬧爆客戶和老闆，再加上適量的關心和flirting，擦出愛火花亦很正常，而且戀愛無分對錯，感覺大過天，難道你覺得還要理性地來一場「辦公室應否談戀愛」的辨論比賽，才可以開始向心儀同事示好嗎？唔好傻啦仲細咩，有時遲一步機會就比人搶咗，到時真係喊都無謂。當然，有時追女仔是要付出代價的。
「Mike！點解你咁都可以做錯？有無帶個腦返工？」老闆大罵。
「Mike！重新再做過份report，我唔鍾意呢個format！」老闆說。
「Mike！今朝比你份嘢有未？成粒鍾都未做好有無搞錯！你咁嘅表現我好難唔延長你個試用期囉！」老闆故意在所有同事面前說。
某些男老闆實在很有趣，總覺得所有女同事都是他的人，只有他可以聊、可以flirt及可以追，所以身為男同事的你，竟敢出言輕薄/聊/flirt女同事，而又剛好被老闆聽個正著的話，我只能對你說：「祝你好運。」追女同事，即是在老闆頭上動土，自掘墳墓，至於情況會有多惡劣，就要看老闆的性格及你心儀女同事的質素，輕則工作量突然倍增，老闆雞蛋裡挑骨頭，每天被罵；重則減人工，甚至工作不保，唔好以為我嚇你，有時男老闆比女老闆更小氣更絕情，皆因男人都很看重面子這回事，是以辦公室還是以地下情居多，低調處理是安全法則之一。
「Hey，Brenda，今日Happy Friday，不如一齊落LKF飲嘢？」老闆Michael笑淫淫地問。
「哎呀今日媽咪生日，我要同佢慶祝呀，下次吖。」Brenda說。
「哦，咁唯有下次啦。」老闆Michael失落地說。
「喂？Mike？頭先老闆真係叫我去飲嘢呀，好彩你之前幫我諗定啲藉口咋！」Brenda說。
「哈哈，都話我有預知能力㗎啦，等我幫你諗多幾個啦！」Mike笑說。
「其實呢我一路都想同你講聲對唔住，話晒都係我間接令你成日比老闆鬧。」Brenda不好意思說。
「小事啦，不過如果你想補救，咪比個機會我請你食飯囉。」Mike故作輕鬆地說。
「Um…好呀，嘻嘻。」Brenda說，並在街上獨自甜笑。
P.S. 小妹曾經在一間PR firm工作，有兩個男老闆，全公司大概有四十個同事，全女班，然後每個星期五人事部都會叫一班囡囡來面試，由於無需經驗，所以每次都有很多剛畢業的囡囡來應徵，同事間暗地裡稱之為昅女大會，很正常地越靚女就in得越耐，男人婆的，不用五分鐘便拜拜，現實就是這樣殘酷。