作為一個撤頭撤尾的耶能，今日等我在此同大家分享如何才是正規的基督徒戀愛觀。現在坊間有太多偏頗的言論，不禁令人覺得道德淪亡，基督徒果然是天天在走窄路啊！
自出娘胎篇
作為一個神聖的信徒，自出娘胎以來我們都已經要求問神，我們未來的另一半是點，為對方祈禱，以致我們在遇見對方時，對方都是已經有預備好的心，男的有正當職業愛主家庭背景有米英俊瀟灑彬彬有禮女的則正當職業愛主家庭背景有米斯文有禮弱質纖纖性情溫柔體貼…（大誤！）Oh 唔是，只是要愛主、愛主、同更愛主就得喇！
耶利米書1章4節：耶利米說：耶和華的話臨到我說：「我未將你造在腹中，我已曉得你；你未出母胎，我已分別你為聖。」作為一個神聖的信徒，當然是要一出世就求問啦，我地呢d分別為聖的，是唔可以同未信主的一齊架！
中學生年代篇
在教會由細到大，起中學生時代就當然是唔可以拍拖啦（雖然而家的年代都好難的了），有Feel果D都唔可以講出口的。起呢個階段，大家做的是Keep住上面的祈禱，因為「尋找就必尋見」，我相信上帝會帶領我們走前面的道路！
如果你見到身邊邊個團友拍拖，可以的話，是應該要規勸他，提醒他，特別在呢D血氣方剛的年紀，真是拖下對手、錫錫下都會有左BB架。所以，真是唔好亂試拍拖呀。尤其起呢個歪曲的世代中，基督徒就更加要分別為聖，做主的鹽同光。例如浸x會都會搞咩「真愛可等待運動」，話過你聽唔可以搞野，要遵行「戀愛十誡」呀（包括中三前不可拍拖、中四中五不鼓勵拍拖、要俾傳道人知…等等等等）。
未開始篇
話中學生年紀唔好拍住，咁，大專拍得啦掛！哎呀，唔好呀。個程序是要咁的：
- 首先，你有個心上人先。
- 然後，你要睇聖經、睇身邊的人、睇下你阿爸阿媽、傳道人、係咪個個都鐘意佢。最重要就是你有個位話到俾人聽，你點得到上帝的印證。（呢個過程是唔知幾耐）
- 之後，你就同心上人講：其實我有小小鐘意左你呀。
- 跟住，心上人應該會（要）話：其實我都是呀！
你。唔。好。以。為，咁。就。一。齊。得！
你應該講：咁我地一齊問下神啦！於是，就要一齊祈禱，尋問上帝心意（重覆步驟 2）
可能有人問：下？咁明知對方鐘意自己仲搞咁多野做乜？此言差矣！如果你咁就同對方一齊，咁即是睇自己心意大過上帝心意啦！所以步驟 2 是很重要的，雖然是不知道幾耐，但這就是考驗你信心的時候！起呢段時日
至於果 d 同非基督徒拍拖的，已經是跌入罪的網羅了！要知道教會章則都講話，咁樣是犯罪架。如果同非基督徒一齊，分分鐘連最後結婚擺酒都無人去無人幫手！所以如果對方不信主，也要竭力讓對方信主！
而如果你未有對象，你都是應該重覆步驟 2；如果你已經步入中女中佬之年，很想快d結婚，你都是應該重覆步驟 2；而如果你已經過了一般人結婚之年，除了你都是應該重覆步驟 2 之外，你都是咪要問下神你係咪有獨身的恩賜呢？獨身，都是一種恩賜；你不妨求求，就不會咁擔心啦！
一齊篇
幾歷千辛萬苦才一齊到，都有好多野是要注意的，例如：穩定出席教會聚會啦、虔誠事奉啦、十一奉獻啦、不可搞野啦、不可一齊去旅行啦（下刪五百字…）。一齊得，就預左起教會裡面條路是咁；萬一散，傳道人要知、等他可以有d野做，去補救（不過祈咁耐禱都散得就真是…）。
跟住，離不開拍兩年拖、結婚、繼續返教會事奉、過多兩年生個 B，做離地中產。而家的非信徒，調轉哂d次序：拍拖、有左、結婚，甚至有左、拍拖、結婚。神的旨意唔是要我們在性與婚姻上的關係咁混亂的。總結一句，我地咁樣的戀愛，就是神有介入的戀愛；你地睇下而家d人的婚姻，幾乎兩對就有一對離婚，但是我地耶能就唔同呢！所謂「神契合的婚姻人不可以分開」呀嘛。
所以，快d一齊信主，你又好、你的婚姻又好、大家都好，上帝的旨意就在當中成全了！（齊鼓掌！…）
（P. S. 整文都是曲筆，希望不會有人傻豬豬到以為筆者是咁諗。本文致力嘗試亂quote經文、亂用屬靈套語，當中有真的、也有已膠化的。這就是耶能：真理與真心膠之間，再也分不開了。）