香港，或者話香港同大陸（似乎台灣、日本無呢個問題）嘅街頭藝術，我覺得總有一種掃不去嘅悲情「乞食」味，令呢件事好難提升形象。
我喺灣仔街頭見過幾次一個盲嘅老伯同佢老伴（綁埋一齊的），拉墜胡（你唔知咩叫墜胡我唔怪你）拉得好好，一睇就知係「正宗」手法（正宗嘅意思係，套技術係真係傳統留落黎，專門拉墜胡風格嘅樂曲用嘅手法，唔係拎墜胡去拉「妹妹你坐船頭，哥哥在戇撚鳩」果種），講真，係拉得中上，幾好的。但果種「盲公乞食」味，對唔住，真係太重了。另外紅磡行人天橋都有個白鬚公日日拉琴，但真係走音走得太勁，果啲係走音，唔係韻味黎，坐喺到用個八十年代收音機級數嘅拆聲喇叭，問心，的確係唔開胃的。
我覺得街頭賣藝係好有尊嚴，好有品味嘅一件事黎，所有街頭藝人都要警醒呢一點，千萬唔好有一種「施捨個發財錢」嘅形象出黎。身有殘障而有門手藝，應該係一樣咁有尊嚴地去生存，唔應該擺一個可憐樣出黎自己都令自己悲情化。
早幾日有人提到日本仍然有「賤民階級」，我諗咗諗，其實「藝人」呢個職業可算係華人文化裡面嘅「賤民階級」，所以啲人會普遍認為「音樂搵唔到食」，而成日會話啲藝人「果然係偽人」「戲子」等。做戲又點？演奏音樂又點？呢啲歧視標籤，係同時令藝術無辦法向更精緻更純粹嘅方向發展的，只能保持喺大大聲 midi 伴奏音樂然後扯開喉嚨大嗌就當唱歌嘅水平。係好可悲。
身有殘障，唔代表你無尊嚴，而尊嚴，要由自愛、自重、自信建立起。
註：簡單黎講，墜胡就係用弓拉嘅三弦，不過係兩條弦。一般黎講係同三弦一樣蒙蛇皮，亦有啲係蒙木板，如果係蒙蛇皮，聲音會比較似三弦，錚錚然聲音豪邁，如果蒙木板，聲音會比較硬同躁，偏向似板胡（係喇，又係一樣「都唔知你噏乜」嘅樂器，係係係）。最近喺街頭見到嘅係墜板胡。