（photo via cc Flickr user Linzi）
「我好鍾意食嘢，咁我係咪啱做飲食業呀？」剛畢業的Crystal問。
「大佬你唔係咁天真掛？你知唔知做飲食業好辛苦㗎？莫講話做侍應或者做廚吖，連做飲食業嘅marketing都唔易㗎！」Brenda毫不客氣地說。
「唓，日日有得試食喎，辛苦都抵啦！」Crystal說。
「唉，少年，你真係太年輕了。」Brenda說。
回想從前，Brenda也曾經對飲食業充滿幻想，心想可以免費試食，又有員工折扣，正呀！果然，面試時經理真的問她是否喜歡吃公司品牌的朱古力和芝士蛋糕，因為每星期都會有兩次試食，Brenda當然老虎蟹都話鍾意啦！接著再說自己吃過那幾款產品，口感和味道如何，包裝有甚麼特別，再順勢說說公司最近的marketing strategy，其他競爭對手又有甚麼宣傳技倆等，講咁多為乜？其實都只係想間接同人講：「我好有誠意㗎，仲做足功課，請我啦喂！」
一星期後Brenda順利收到offer，開心到跳起，亦證明自己的努力沒有白費。第一天上班她便和同事一起試食松露朱古力，經理問她覺得味道如何，她如實說：「好味。」經理卻說：「其實這是次貨，用料比例不對，溫度控制亦不佳，試多幾次你就分到。」Brenda覺得很尷尬，因為她真的覺得很好吃，絕非是想擦公司鞋，或許是她從沒吃過100分的松露朱古力，所以吃到70分的便已經覺得很好吃了。
上班的第一個月，Brenda每天都感到很興奮，因為公司除了零售，亦有數間cafe，每天都可以試不同的食品和飲品，天天新款，有時她更會拍下照片傳給朋友說：「入飲食業真係無錯呀！」直至公司說要研發新產品 – 榴槤朱古力。這對Brenda來說簡直是地獄，因為她最憎吃榴槤，而且這次是新產品，需要不斷改良，可能要連續試一星期。可能你話，marketing又唔係廚又唔係老闆，使乜試呀？錯喇，做得marketing，當然要親身試食，唔試又點知係咩味呢？對個product唔了解的話又點sell呢？加上老闆叫到，唔食即係唔比面啦？唔通真係同老闆講對榴槤有敏感咩？都係嗰句啦，為咗份工，你可以去到幾盡？
試食的產品其實未必好味，由無變有，是經過很多次的trial and error，有時又要試產品是否過了某一段時間便會變味，總之簡單來就是白老鼠，幸好老闆也算是義氣仔女，每次都會與Brenda和其他員工一起試食和試飲，其實老闆年紀也不少，保守估計應該有六十歲，有次試了八種朱古力後他說：「唉，今日醫生先話我糖尿越來越嚴重，唔好食咁多甜嘢。」於是Brenda細細聲和旁邊的同事說：「吓，老闆會唔會有事㗎？」同事大笑，叫她張開眼看清楚，原來老闆每一粒朱古力都是咬了一小口便放在碗中，可憐的Brenda把整整八粒朱古力都吞下去，然後換來老闆一句：「呢個新力軍勁喎，以後多啲落嚟一齊試嘢啦！」都算是傻人有傻福了。
小妹都做飲食業，所以也略知一二，其中一個特色是很多時都要親力親為，即使是marketing，也可能經常要入濕漉漉的廚房，所以如果你有潔癖就拜拜喇。此外，和廚師、侍應、清潔姐姐和收銀姐姐溝通也是一大挑戰，特別是面對老一輩的員工，你和他說想在Facebook辦個推廣活動，可否給你食材的資料，然後他一頭霧水地問：「吓？你話咩『飛卜』話？」真係嚇到你一額汗，仲諗住send email？無電腦喎！唔使驚，傳統嘅方法雖然無新科技咁快咁方便，但永遠都咁work，好少躂Q，就係寫紙仔喇，係咪即刻諗返起中學時暗地裡傳紙比同學仔嗰種浪漫呢？發夢啦你！現實中你只係拎住張好污濁沾滿污積嘅紙比一個大叔，然後豪氣地說：「大佬！麻煩拍硬檔聽日幫我搞掂佢！」
如果你只是喜歡吃，我勸你還是考慮清楚，因為做飲食業真的不是那麽簡單，愛吃只是其中一個要求，如果你怕肥，吃叉燒要叫全瘦仲要一有肥肉舌頭就自動過瀘吐出來的話，我勸你還是另謀高就。而且飲食業的profit margin 亦不大（當然要看是和甚麼行業比較），須知道公司蝕錢就裁marketing，所以這未必是一份穩定的工作。其實做飲食還有很多麻煩的東東，不過小妹還是非常喜歡這份工作，至於點解？就請看下回分解了。